Jesaja 20

₁Dan jagi go Assyria gonagas Sargon lei vuolggahan Ašdodii soahteveagaoaivámuččas fallehit gávpoga ja váldit dan, ₂de Hearrá sártnui Jesaja, Amosa bártni, bokte. Son celkkii: “Nuola horstagárvvuidat ja gápmagiiddát.” Jesaja dagai nu ja váccii álásin ja rabas julggiid.

₃Hearrá celkkii: “Nugo mu bálvaleaddji Jesaja lea vázzán álásin ja rabas julggiid golbma jagi mearkan ja ávaštussan Egyptii ja Nubiai, ₄nu vázzet nuorat ja boarrásat álás ja rabas julggiid, go Assyria gonagas doalvu egyptalaččaid ja nubialaččaid fáŋgavuhtii. Sii šaddet vázzit rabas čurttiid, Egyptii heahpadin. ₅Dalle buohkat hearddohuvvet ja beahtahallet Nubiai masa sii ledje bidjan doaivvu, ja Egyptii mainna sii ledje rámohallan.

₆Dan beaivvi dadjet dán rittu olbmot: ‘Nu geavai daidda geaidda mii bijaimet doaivvu, daidda geain mii ozaimet veahki, vai gáddjojuvvošeimmet Assyria gonagasa gieđas! Mo mii dál beassat báhtarussii?’”