Jesaja 21

Nugo riđđubiekkat jorret Negevis,

nu juoga boahtá meahcis,

balddihahtti eatnamis.

₂Suorggatlaš oainnáhus

lea addojuvvon munnje:

Beahttit behttet,

hearjideaddjit hearjidit.

“Elam, mana ovddos!

Media, fallet!

Mun loahpahan buot luoibmama.”

₃Dán oainnáhusa dihte

mu rumaš doarggista,

mun dohppehalan ávttaide

dego riegádahtti nisson.

Mun suorganan das maid gulan,

mun gáfestuvan dan maid oainnán.

₄Mu miella lea seahkanan,

mun doarggistan balus.

Eahketveaigi maid mun áibbašin,

gavdnje mu dál.

₅Beavddit lágiduvvojit, ránut lebbejuvvojit,

olbmot borret ja juhket.

Dalle:

“Čuožžilehket, oaivámuččat!

Vuoiddadehket galbbaid!”

₆Ná Hearrá celkkii munnje:

Bija várdájeaddji, gii dieđiha

maid oaidná.

₇Jos son oaidná vovnnaid

maid heasttat gesset,

riidejeddjiid áseniid sealggis,

riidejeddjiid kamelaid sealggis,

de son galgá guldalit, guldalit dárkilit.

₈Ja várdájeaddji čuorvvui:

“Hearrá, beaivvi guhkkut mun várdájin,

mun lean várdobáikkistan juohke ija.

₉Geahča! Dál bohtet olbmát vovnnaiguin

maid heasttat gesset.”

Ja son čuorvvui:

“Gahččan, gahččan lea Babylon!

Buot dan ipmilgovat

leat cuvkejuvvon eatnamii!”

₁₀Mu álbmot, cuovkkas ráidnejuvvon

gordneráidnensajis,

dan maid lean gullan Hearrás,

Almmiveagaid Ipmilis,

Israela Ipmilis,

dan mun lean almmuhan didjiide.

Soamis čuorvu munnje Seiras:

“Goziheaddji, goas idja nohká?

Goziheaddji, goas idja nohká?”

₁₂Goziheaddji vástida:

“Iđit lea boahtán, dattetge lea idja.

Jos dis lea jearramuš, de jerret,

bohtet fastain!”

Meahci miestagiid siste

dii galgabehtet idjadit,

Dedana karavánat.

₁₄Buktet čázi goiki olbmuide,

dii Tema ássit,

mannet báhtareddjiid ovddal, buktet láibbi!

₁₅Siihan báhtarit miehkis,

rabas miehkis

ja geldojuvvon dávggis,

soađi garasvuođas.