Jesaja 22

Mii dus lea heahtin?

Manin buot du ássit

leat gorgŋon dáhkiid ala,

₂don šlábmájis, riedjalas gávpot,

don ávvudeaddji, ilolaš gávpot?

Du gahččan olbmát

eai gottáhallan miehkkái

eaige jápmán soahtái.

₃Buot du oaivámuččat báhtaredje

geldojuvvon dávggis,

guhkás báhtaredje du sáŋgárat.

₄Dan dihte mun siđan:

Diktet mu orrut,

diktet mu čierrut.

Allet vikka jeđđet mu,

go mu álbmot duššá.

₅Dát lei Hearrá Ipmila,

Almmiveagaid Ipmila, beaivi,

hirpma ja stuimmi ja moivašumi beaivi.

Oainnáhusleagi muvra gaikojuvvui,

ja dan čuorvvas gullui váriide.

₆Elam válddii njuollaskuohpu,

Kir dohppii galbba.

₇Vovnnat ja heasttat devde

du čáppa legiid.

Dat fallehedje du poarttaid

₈ja rabastedje Juda suoji.

Dan beaivvi dii gal manaidet dárkkistit

Vuovdeviesu vearjjuid.

₉Dii oinniidet ahte Davida gávpogis

ledje máŋga áldá,

ja dii čohkkiidet čázi Vuolleáldái.

₁₀Dii logaidet Jerusalema viesuid,

dii gaikkodeiddet daid

vai beasaidet nannet muvrra.

₁₁Dii rokkaidet áldá

guovtti muvrra gaskii

Boaresláddo čáziid várás.

Muhto dii ehpet jorgalan

su beallái gean dahku buot lea,

dii ehpet geahččan su beallái

gii sivdnidii dán dolin juo.

₁₂Hearrá Ipmil, Almmiveagaid Ipmil,

rávkkai din dan beaivvi

čierrut ja váidalit,

ráhket oaivvi

ja gárvodit morašbiktasiid.

₁₃Muhto dan sadjái lea illu ja ávvu!

Dii goddibehtet vuovssáid

ja njuovvabehtet sávzzaid,

dii borrabehtet bierggu

ja juhkabehtet viinni.

“Borrot ja juhkot,

ihttinhan mii jápmit!”

₁₄Hearrá Ipmil, Almmiveagaid Ipmil,

lea almmuhan munnje dán:

Dát suddu báhcá soabakeahttá

gitta din jápmima rádjái.

Ná cealká Hearrá Ipmil, Almmiveagaid Ipmil.

₁₅ Hearrá Ipmil, Almmiveagaid Ipmil,

sártnui ná:

Mana doalvut Šebnái,

gonagasa hálddašeaddjái

ja hoava oaivámužžii, dán sága:

₁₆Gii olbmáid don leat,

mii don gáttát dáppe leat,

go rokkahat alccesat hávddi

allagassii várregilgii,

dagat alccesat visti bávtti sisa?

₁₇Ná geavvá: Hearrá suhppe du eret!

Son gurpe du čoahkkái,

₁₈nođđuda du nođđun

ja bálkesta du dego spáppa viiddis eatnamii.

Dohko don jámát,

ja dohko gártet du čikŋavovnnat,

don hearrát viesu heahpat!

₁₉Mun nordadan du virggistat,

gaikkun du vuolás iežat sajis.

₂₀Dan beaivvi mun rávkkan

bálvaleaddján Eljakima, Hilkia bártni.

₂₁Mun gárvvuhan sutnje du gárvvuid,

čavgen du boahkána su alimiid birra

ja attán sutnje dan válddi mii dus dál lea,

ja son šaddá áhččin Jerusalema ássiide

ja oppa Juda čerdii.

₂₂Mun bijan Davida viesu čoavdaga

su oalggi ala.

Go son rabasta, de ii oktage dahpa,

ja go son dahppá, de ii oktage rabas.

₂₃Mun gidden su návlin nana báikái,

ja su alla árvu šaddá gudnin su áhči sohkii.