Jesaja 28

₁Vuoi Efraima juhkkiid

goargadis kruvnnu,

vuoi čáppa čiŋa goldnan liđiid

mat hervejit viinnahuvvan

olbmáid oaivečohka!

₂Geahča, Hearrás lea muhtin

gii lea gievra ja fámolaš

dego čuorpmasoakti

dahje heavaheaddji riđđu,

nugo ráššoarvi ja dulvi.

Gieđainis son časká eatnama,

₃julggiidisguin son duolbmá

Efraima juhkkiid goargadis kruvnnu.

₄Čáppa čiŋa goldnan liđiide,

mat leat šattolaš leagi

oaivečohka kruvdnu,

geavvá dego giđđageasi fiikonii:

Dalán go soamis oaidná dan,

de son váldá dan ja njielasta.

₇Muhto maiddái dáppe

olbmot suibbodit viinni dihte,

ruosadit garra juhkamuša geažil.

Báhpat ja profehtat leat juhkaluvvan,

áibbas gárihuvvan viinnis.

Sii suibot garra juhkamuša dihte,

ruosadit go oidnet oainnáhusaid,

gusset go leat cealkimin duomu.

₈Buot bevddiid dievva lea vuovssanas,

ii leat ii buhtes dielkuge.

₉“Gean profehta áigu máhttáhit?

Geasa son áigu oahpahit iežas sága?

Botkehuvvon mánáidego,

daidda geat leat

aiddo váldojuvvon čiččis?

₁₀Báhkkon báhkkoma ala,

gáibádus gáibádusa ala,

veahá dás ja veahá duos!”

₁₁Duođaid, áddemeahttun suopmaniin

ja amas gillii Hearrá sárdnu dán álbmogii,

₁₂son gii celkkii sidjiide:

“Dá lea vuoiŋŋastanbáiki,

diktet váiban olbmo vuoiŋŋastit!

Dás lea áhpásmahttojupmi.”

Muhto sii eai dáhtton gullat.

₁₃Sidjiide Hearrá sátni šaddá

báhkkomin báhkkoma ala,

gáibádussan gáibádusa ala,

veahá dás ja veahá duos.

Váccedettiin sii guossalit,

gahččet gávvut ja bávččagit bahuid,

roahkkasit gillii ja giddanit.

₁₄Gullet dan dihte Hearrá sáni,

dii bilkideaddjit,

dán álbmoga ráđđejeaddjit

geat ássabehtet Jerusalemis!

₁₅Dii dadjabehtet:

“Mii leat dahkan lihtu jápmimiin,

šiehtadan soahpamuša jábmiidáimmuin.

Go dulvi boahtá šáva,

de dat ii ole min rádjái.

Mii leat dahkan behttosa iežamet suodjin

ja čiehkádan giellása duohkái.”

₁₆Dan dihte Hearrá Ipmil cealká ná:

Geahča, mun bijan Sionii čiehkageađggi,

geahččaluvvon geađggi,

divrras, nana čiehkageađggi.

Dat gii osku, ii muosehuva.

₁₇Mun dagan rievtti mihttobáddin

ja vanhurskkisvuođa loaddaárpun.

Čuorbmasat njámastit

giellása suoji,

čáhcedulvi doalvu mielddis

čiehkádanbáikki.

₁₈Dalle din lihttu jápmimiin

fámohuhttojuvvo,

din šiehtadus jábmiidáimmuin

gomihuvvo.

Go dulvi boahtá,

de dat njeaidá din.

₁₉Juohke háve go dat boahtá,

de dat rohtte din mielddis.

Dat boahtá juohke iđida,

velá beaivet ja ihkkunai.

Dat gii ipmirda sága,

šaddá doarggistit balus.

₂₀Seaŋga lea beare oanehaš

das fanahallat,

ja govččas ilá seaggi

giessat dan sisa iežas.

₂₁Hearrá čuožžila dego Perasimváris,

son moaráhuvvá nugo Gibeonleagis.

Son dahká dagus, amas dagus,

son ollašuhttá barggus, imašlaš barggus.

₂₂Heitet bilkideames,

vai din láhkkit eai čavgejuvvo.

Mun lean gullan ahte Hearrá Ipmil,

Almmiveagaid Ipmil,

lea mearridan duššadit oppa eatnama.

₂₃Jorgalehket beljiid

ja guldalehket go mun sártnun,

váldet vuhtii ja gullet mu sániid!

₂₄Gárvvistagoson eananjorgu

bealddu álohii gilvima várás,

rahpágo ja hárve dan álelassii?

₂₅Iigo son gilvve go lea jalgen bealddu?

Son gilvá čáhppeskumminiid

ja biđge máisttakumminiid,

son gilvá nisuid, hirsegortniid,

bivggiid ja spealttaid.

₂₆Hearrá oahpaha sutnje

rivttes vuogi,

su Ipmil máhttáha sutnje mo bargat.

₂₇Ii oktage ráidne

čáhppeskumminiid reagain

iige fierat jorreráhttá

máisttakumminiid badjel.

Čáhppeskumminiid galgá časkit soppiin

ja máisttakumminiidgis asttáhagain.

₂₈Cuvkejuvvojitgo láibegortnit?

Dat eai ráidnejuvvo heaittekeahttá,

jorreráhtis ii fierahuvvo daid badjel,

lebbejuvvon gortnit eai cuvkejuvvo.

₂₉Maiddái dat boahtá

Hearrás, Almmiveagaid Ipmilis.

Su ráđit leat ovddolaččat,

su viisodat stuoris.