Jesaja 29

₁Vuoi Ariel, Ariel,

vuoi du, gávpot

man lusa David luoitalii!

Lasihehket jahkái vel jagi,

diktet basiid čuovvut nuppiideaset!

₂Mun áŧestan Ariela,

ja doppe šaddá moraš ja váidaleapmi.

Ariel šaddá mu áltárin.

₃Dego David mun luoitalan

birastahttit du,

bijan toartnaid du birra

ja ceggen seinniid du vuostá,

₄ja don gahčat eatnamii.

Doppe don sártnut,

ja du jietna gullo vuollegažžan muolddas

dego jámeža jietna,

nugo savkkas mii badjána čievrra vuolde.

₅Du gážžáris gázzi šaddá dalle gavjan,

veahkaválddálaččaid joavku

girdi sáđđun.

Fáhkkestaga, čalbmeravkalanbottus

dat dáhpáhuvvá:

₆Hearrá, Almmiveagaid Ipmil ieš,

ozahallá gávpoga

julain ja ráđain ja garra beaškasiin,

garra riđuin ja duššadeaddji dolain.

₇Dego niehku, nugo ija deattán

leat dalle buot álbmogat

mat vulge soahtat Arieliin,

buohkat geat fallehedje gávpoga

ja dan muvrraid ja áŧestedje dan.

₈Nugo nealgeolmmoš

niegada leat borramin,

muhto morihettiin lea ain nealggis,

nugo goikan olmmoš niegada

leat juhkamin,

muhto morihettiin lea ain

vuoimmehuvvan ja goikan,

nu geavvá álbmogiid eatnatvuhtii

mii lei fallehan Sionvári.

₉Jávohuvvet ja imaštallet,

rávjot čalmmeheapmin!

Gárihuvvet – earás go viinnis,

ruosadehket – earás go garra juhkamušain!

₁₀Hearrá lea vuhtton

din losses nahkáriidda.

Son lea dahppan din čalmmiid,

din profehtaid,

ja gokčan din oivviid,

din oidniid.

₁₃Hearrá celkkii: Dát álbmot

lahkonii mu njálmmiin

ja gudnejahtii mu baksamiiguin,

muhto sin váibmu lea gáidan mus,

sin ipmilballu lei olbmuid báhkkomat

maid sii ledje oahppan.

₁₄Danne mun velá oktii

hirpmástuhttán dán álbmoga

imašlaš, ovddolaš daguiguin.

Dalle viisáid viisodat nohká,

jierpmálaččaid jierbmi jávká.

₁₅Vuoi daid geat čiegus čiekŋalassii

čihket Hearrás áigumušaideaset

ja dahket daguideaset seavdnjadasas,

daid geat dadjet:

“Ii oktage oainne min, ii oktage dieđe!”

₁₆Vuoi din jorggujurdagiid!

Leago láirá láirálihttedahkki veardásaš?

Sáhttágo duodji dadjat

duddjojeaddjis birra:

“Ii son leat duddjon mu”?

Sáhttágo lihtti dadjat

láirálihttedahkki birra:

“Ii son ádde maidege”?

₁₇Fargga, oanehis áiggi geažes,

Libanona várit šaddet šaddogárdin,

ja gárddit leat viidát dego vuovddit.

₁₈Dan beaivvi bealjeheamit gullet

go girjegearru lohkkojuvvo,

čalmmeheamit besset olggos

moskosis ja seavdnjadasas,

ja sin čalmmit oidnet.

₁₉Vártnuheamit ožžot fas

illudit Hearrás,

ja geafimusat ávvudit Israela Basis.

₂₀Veahkaválddálaččathan leat eret,

bilkideaddjit leat jávkan,

duššaduvvon leat buohkat

geat áigo dahkat bahá,

₂₁dat geat áššáskuhtte

vigihis olbmuid rievttis,

bidje gielaid daid ovdii

geat čuoččuhedje vuoigatvuođa,

dat geat gielistemiin botnje

sivaheami ášši.

₂₂Dan dihte Hearrá

gii lonistii Abrahama,

cealká Jakoba álbmogii:

Dál ii šatta Jakob šat heahpadii,

su ámadadju ii šat ruvssot heahpadis.

₂₃Go son, su mánát,

oidnet maid mun dagan sin gaskkas,

dalle sii basuhit mu nama.

Sii basuhit Jakoba Basi,

sii ballet Israela Ipmilis.

₂₄Dat geat leat čádjidan,

ožžot ipmárdusa,

ja nimmoreaddjit bagaduvvojit.