Jesaja 39

₁Go Babylonia gonagas Merodak-Baladan, Baladana bárdni, gulai ahte Hiskia lei leamaš buohccin ja lei fas buorránan, de son vuolggahii sutnje reivve ja attáldagaid. ₂Hiskia illosii go áirasat bohte, ja son čájehii sidjiide iežas vuorkáviesu ja dan silbbaid ja golliid, hádjaurtasiid ja fiinna oljju ja velá oppa iežas vearjoráju ja buot, mii lei su dávvirrájuin. Oppa šloahtas ja oppa riikkas ii lean mihkkege diŋggaid maid son ii livčče čájehan sidjiide. ₃Dalle profehta Jesaja bođii gonagas Hiskia lusa ja jearai sus: “Mii duoin olbmáin lei áššin? Gos sii ledje boahtán?” Hiskia vástidii: “Sii ledje boahtán gáiddus eatnamis, Babylonias.” ₄Jesaja jearai: “Maid don čájehit sidjiide, go sii ledje du guossis?” Hiskia vástidii: “Mun čájehin sidjiide buot mii mu šloahtas lea. Mu dávvirrájuin ii leat mihkkege maid mun in livčče čájehan sidjiide.” ₅Dalle Jesaja dajai Hiskiai: “Gula Hearrá, Almmiveagaid Ipmila, sáni: ₆Boahtá beaivi goas buot mii lea du šloahtas, buot maid du áhčit leat čohkken gitta dán beaivvi rádjái, dolvojuvvo Babyloniai. Ii mihkkege báze, cealká Hearrá. ₇Sii váldet muhtumiid du bártniin, dain geat leat du iežat nális, ja bidjet sin hoavvabálvalussii Babylonia gonagasa šlohttii.” ₈Hiskia dajai Jesajai: “Hearrá sátni maid don sárdnot, lea buorre.” Son oainnat jurddašii: “Lea goit ráfi ja oadjebasvuohta nu guhká go mun ealán.”