Jesaja 50

₁Ná cealká Hearrá:

Gos lea earrogirji mainna mun

vuolggahin eret din eatni?

Dahje leango mun vuovdán din

muhtin velgoheaddjásan?

Ii nu, dii vuvdojuvvuidet

iežadet vearredaguid dihte,

ja din eadni vuolggahuvvui eret

din rihkkumiid geažil.

₂Manne ii lean das oktage

go mun bohten,

manne ii oktage vástidan

go mun čurvon?

Leago mu giehta ilá oanehaš

lonistit din,

iigo mus leat fápmu beastit?

Mun čergen merrii, ja dat goiká,

jogat šaddet goikeeanamin.

Guolit guohcagit ja bahčiidišgohtet

go ii leat čáhci,

buot dat goiket jámas.

₃Mun govččan almmi čáhppadiin,

gárvvuhan dasa morašgárvvuid.

₄Hearrá Ipmil lea addán munnje

máhttájeaddji njuokčama,

nu ahte mun máhtán roahkasmahttit

váiban olbmo.

Juohke iđida son dahká

mu bealji gearggusin

guldalit máhttájeddjiid láhkái.

₅Hearrá Ipmil rabastii mu beljiid.

Mun in vuostálastán,

in geassádan eret.

₆Mun adden sealgán cábmojuvvot,

nieraidan skávžžáid gaikojuvvot,

in čiehkan muođuidan hiddjádusas,

in čolggain.

₇Hearrá Ipmil veahkeha mu,

danne mun in bala hiddjádusain.

Mun dagan muođuidan

garasin dego geađgi.

Mun dieđán ahte in šatta heahpadii.

₈Son lea lahka guhte dahká

mu vanhurskkisin.

Gii áigu lágastit muinna?

Loaiddasteadnu dikki ovdii.

Gii dáhttu áššáskuhttit mu?

Bohtos son ovdan!

₉Hearrá, mu Ipmil, veahkeha mu,

gii dalle sivahallá mu?

Dat buohkat gollet dego biktasat,

muohcu borrá daid.

₁₀Guhtemuš dis ballá Hearrás

ja guldala su bálvaleaddji

gii vádjola seavdnjadasas

almmá čuovgga haga,

muhto luohttá Hearrá nammii

ja dorvvasta Ipmilii?

₁₁Dii buohkat geat cahkkehehpet dola

ja buolláhehket dollanjuolaid,

mannet ieža njuoršu doladet čađa

ja buolli njuolaideattet gaskii!

Mu gieđas dát boahtá:

Givssis dii šaddabehtet veallát.