Jesaja 51

₁Gullet mu,

dii geat váinnuhehpet vanhurskkisvuođa

ja ohcabehtet Hearrá!

Gehččet báktái mas lehpet loggojuvvon,

geađgeroggái man čiekŋalasas

lehpet roggojuvvon.

₂Gehččet Abrahamii, áhččáseattet,

ja Sarai gii din riegádahtii!

Abraham lei dušše okta

go mun rávken su,

muhto mun buressivdnidin su

ja dahken su eatnagin.

₃Hearrá jeđđe Siona

ja árpmiha dan viessobázahasaid.

Son dahká dan meahci Edena láhkásažžan,

dan ávdin eatnamiid

dego Hearrá gilvvagárdin.

Doppe lea ávvu ja illu,

doppe gullojit máidnunlávlaga šuoŋat.

₄Guldal mu, mu álbmot,

gullet dárkilit, olbmuid čearddat!

Mus vuolgá láhka,

mu vuoigatvuohta

šaddá álbmogiid čuovgan.

₅Mu vanhurskkisvuohta lahkana,

mu bestojupmi bohciida,

fámolaš gieđain mun dubmen álbmogiid.

Gáiddus eatnamat vurdet mu,

dat bidjet doaivvuset mu fápmui.

₆Bajidehket geahčastaga almmi guvlui,

geahčadehket eatnama vuollin!

Albmi bossojuvvo eret dego suovva,

eanan oapmu dego bivttas,

dan ássit jápmet dego čurohat.

Muhto mu bestojupmi bistá agálaš áigái,

mu vanhurskkisvuohta ii dušša goassege.

₇Gullet mu, dii geat dovdabehtet

vanhurskkisvuođa,

dii geain lea váimmus mu láhka:

Allet bala olbmuid hiddjádusain,

allet suorgan sin bilkosániin!

₈Sidjiide geavvá dego biktasii

maid giksa borrá,

nugo ullodiŋgii maid muohcu loaktá.

Muhto mu vanhurskkisvuohta

bistá agálaš áigái,

mu bestojupmi buolvvas bulvii.

₉Gohccá, gohccá,

gárvot gievravuođa ja fámu, Hearrá!

Gohccá nugo dološ beivviid,

nugo dološ buolvvaid áigge!

Donhan časket jámas Rahaba,

rehttejit čieŋalvuođa guovddi.

₁₀Don goikadit ábi,

čiekŋalis meara čáziid,

don dahket mearabotni geaidnun

lonistuvvon olbmuid mannat rastá.

₁₁Dat geaid Hearrá lea lonistan,

máhccet,

sii bohtet Sionii ávvudemiin,

agálaš illu oaivvi badjel.

Ávvu ja illu jokset sin,

moraš ja šuohkkin báhtarit.

₁₂Mun, mun lean din jeđđejeaddji.

Manin don balat jámolaš olbmuin,

olbmománáin geat goldnet dego rássi?

₁₃Don leat vajáldahttán Hearrá,

du sivdnideaddji,

gii lebbii almmi

ja bijai eatnama vuođđudusaid.

Álohii, geažos beaivvi

don soiget soardi moari,

go son iskkai duššadit du.

Gos dál lea soardi moarri?

₁₄Fargga beassá luovos láhkkiin

dat gii lea šaddan fáŋgan,

ii son biddjojuvvo hávdái,

ii sus váillo šat láibi.

₁₅Mun lean Hearrá, du Ipmil,

mun stuimmáskahtten meara

nu ahte bárut máraidedje,

mu namma lea Hearrá, Almmiveagaid Ipmil.

₁₆Mun lean bidjan sániidan du njálbmái

ja gokčan du gieđaidan suodjái.

Mun gii lebbejin almmi

ja bidjen eatnama vuođđudusa,

mun cealkkán Sionii: “Don leat mu álbmot.”

₁₇Gohccá, gohccá!

Čuožžil, Jerusalem!

Don leat juhkan Hearrá gieđas

su moari geara,

gurren gitta botni rádjái

lihti mii bijai du suoibut.

₁₈Ii oktage bártniin

maid don leat riegádahttán,

leat dáhtton láidet du,

ii oktage buot mánáin

geaid don leat biebman,

leat váldán du gihtii.

₁₉Lihkuhisvuođat deaividedje

du guovttegeardásaččat

– giiba du árkkášivččii! –

stajádus ja billisteapmi,

nealgi ja miehkki

– giiba du jeđđešii!

₂₀Du bártnit veallájit

vuoimmeheapmin gáhtačiegain

dego antilohpat fierpmis,

sii leat deaivvahallan

Hearrá buolli moarrái,

du Ipmila suhttui.

₂₁Danne gula dal dán, duotna,

don gii leat gárihuvvan, muhto it viinnis.

₂₂Ná cealká du hearrá,

Hearrá, du Ipmil,

son gii čuoččuha iežas álbmoga ášši:

Mun válddán du gieđas lihti

mii bijai du suoibut,

it goassege šat dárbbaš juhkat

mu buolli moari gearas.

₂₃Mun bijan dan du givssideddjiid gihtii,

daid geat gohččo du:

“Veallán eatnamii,

vai mii beassat vázzit du badjel!”

Don šaddet addit sealggát dulbmojuvvot,

jalges eanamin, olbmuid johtolahkan.