1Guhtemuš mis oskkui sáhkii
maid gulaimet,
geasa Hearrá fápmu lei almmus?
2Son bohciidii Hearrá muođuid ovddas
dego vesá,
nugo ruohtasihtu goikeeatnamis.
Ii sus lean čábbodat
iige hámálašvuohta
mii livččii geasuhan min,
ii neahku masa livččiimet liikon.
3Son lei badjelgehččojuvvon
ja olbmuid hilggohas,
gibuid olmmái, buozalvassii oahpis,
gean ovddas
olbmot čihke muođuideaset.
Son lei badjelgehččojuvvon,
eatge mii atnán su maninge.
4Muhto min buozalvasaid son guttii,
min gibuid son válddii iežas noađđin.
Mii navddiimet su gillát ráŋggáštusa,
gáttiimet ahte Ipmil časkkii
ja givssidii su,
5vaikko son hávvádahttojuvvui
min rihkkumiid dihte,
cuvkejuvvui min vearredaguid geažil.
Son ráŋggáštuvvui
vai mii anášeimmet ráfi,
su háviid hattiin mii leat dálkkoduvvon.
6Mii buohkat čádjideimmet
dego sávzzat,
juohkehaš mis spiehkastii iežas geidnui,
muhto Hearrá divttii
min suddovealggi deaivat sutnje.
7Son vuollánii illasteapmái,
ii son rabastan njálmmi.
Dego láppis mii dolvojuvvo njuovvamii,
dego sávza mii orru jaska
beaskideddjiidis ovddas,
ii songe rabastan njálmmi.
8Son dohppejuvvui, dubmejuvvui
ja dolvojuvvui eret,
muhto guhtemuš su álbmogis das beroštii?
Son jávkaduvvui ealli olbmuid ilmmis,
son goddojuvvui
iežas álbmoga vearredaguid dihte.
9Son galggai hávdáduvvot
ipmilmeahttumiid gaskii,
muhto riggá hávddis
son oaččui vuoiŋŋadansaji.
Son ii goassige lean dahkan vearrivuođa
iige su njálmmis lean behtolašvuohta.
10 Hearrá anii buorrin
ahte son cuvkejuvvui,
ahte son rehttejuvvui.
Muhto go son attii iežas vealgeoaffarin,
de son oažžu náli ja eallá guhká,
ja Hearrá dáhttu ovdána su bokte.
11Áŧestusaidis maŋŋil
son oaidná čuovgga
ja gallehuvvo ipmárdusain.
Mu vanhurskkis bálvaleaddji
dahká vanhurskkisin eatnagiid,
guoddá sin suddovealggi.
12Mun attán sutnje oasi
stuorráid gaskkas,
divttán su juohkit sállaša fámolaččaiguin,
danin go son lei gearggus jápmit
ja lohkkojuvvui vearredahkkiid searvái.
Son guttii eatnagiid suddovealggi,
son rohkadalai suttolaččaid ovddas.
