Jesaja 59

₁Ii Hearrá giehta leat oanehaš beastit

iige su beallji headju gullat.

₂Ii nu, din vearredaguthan

earuhit din din Ipmilis.

Din suttut leat čiehkan su muođuid,

nu ahte son ii gula din,

₃danin go varra lea duolvadan

din gieđaid,

vearredagut din suorpmaid,

din baksamat sárdnot giellásiid

ja din njuovčča savkkuha behtolašvuođa.

₄Ii oktage mana riektái vuoiggalaččat,

ii oktage váidde nuppi rehálaččat.

Buohkat dorvvastit guorusvuhtii

ja sárdnot giellásiid,

guddet goaŧusteaset lihkuhisvuođa

ja riegádahttet heavu.

₅Sii monnot gearbmašmoniid

ja gođđet heavnnifirpmiid.

Dat gii borrá daid moniid, jápmá,

ja jos muhtin dain cuovkana,

de das ihtá mirkogearpmaš.

₆Sin gođus ii dohkke bivttasin,

sin dujiid ii sáhte gárvodit.

Sin dagut buktet lihkuhisvuođa,

sin gieđat dagahit veahkaválddi.

₇Sii dopmet buot dasa mii lea bahá,

sii leat johtilat golggahit vigihis vara.

Sin áigumušat leat bahát,

sin luottain lea veahkaváldi ja billašupmi.

₈Eai sii dovdda ráfi geainnu,

sin luottain ii leat vuoigatvuohta.

Sii lávkot moalkás bálgáid

– gii daid johtá, ii oaččo ráfi.

₉Dan dihte riekti lea guhkkin mis,

vanhurskkisvuohta ii ole midjiide.

Mii vuordit čuovgga,

muhto lea seavdnjat,

mii áibbašit beaivečuovgga,

muhto fertet vádjolit

ija suoivaniid siste.

₁₀Nugo čuovggaheamit

mii ráivut seaidneguoraid,

mii guldalit gieđain

dego mis eai livčče čalmmit.

Mii guosadit beaiveguovdil

dego veiggodettiin,

buoremus agis mii leat dego jábmit.

₁₁Mii muraidit dego guovžžat,

mii luoibmat nugo duvvát.

Mii vuordit vuoiggalašvuođa,

muhto dat ii leat,

bestojumi, muhto dat lea mis guhkkin.

₁₂Min rihkkumat leat eatnagat,

min suttut duođaštit min vuostá.

Mii muitit rihkkumiiddámet,

mii diehtit ahte leat suddudan.

₁₃Mii leat jorralan eret

ja biehttalan Hearrá,

mii leat jorgalan sealggi Ipmilasamet,

sárdnon veahkaválddi ja

behtolašvuođa sániid,

sahkanahttán giellásiid

ja cealkán daid albmosii.

₁₄Ná vuoigatvuohta lea

duvdojuvvon eret,

vuoiggalašvuohta lea guhkkin,

duohtavuohta lea guossalan márkanšiljus,

rehálašvuhtii ii leat sadji.

₁₅Duohtavuohta lea jávkan,

dat gii jorgala eret bahás, rieviduvvo.

Buot dán Hearrá oinnii,

ja su čalmmiin lei bahá

go eatnamis ii lean

mihkkege vuoigatvuođaid.

₁₆Son oinnii ahte

ii oktage ovddidan su ášši,

ja son ovddošii dan.

Dalle su giehta veahkehii su,

su vanhurskkisvuohta lei sus duvddan.

₁₇Son gárvodii vanhurskkisvuođa

ruovdebiktasa,

bijai bestojumi ruovdegahpira oaivái,

gárvvuhii alccesis mávssaheami gárvvu

ja giesai iežas birra

buolli áŋgirvuođa oalgebiktasa.

₁₈Moriin son mávssaha vuostálastiidasas

dan maid sii leat dahkan,

son mávssaha vašálaččaidasas,

mávssaha gáiddus eatnamiidda.

₁₉Oarjin ja nuortan olbmot ballet

Hearrá namas ja su hearvásvuođas,

go son boahtá dego boršu dulvi

maid Hearrá dálki ádjá.

₂₀Muhto Sionii Hearrá boahtá beastin,

Jakoba náli lusa lonisteaddjin,

cealká Hearrá.