Jesaja 60

₁Čuožžil, šearrá, Jerusalem!

Du čuovga boahtá,

Hearrá hearvásvuohta badjána

du badjelii.

₂Seavdnjadas gokčá eatnama,

álbmogiid badjel lea mierká,

muhto du albmái badjána iđedisguovssu,

Hearrá hearvásvuohta suonjarda

du badjelis.

₃Álbmogat vádjolit du čuovgga guvlui,

gonagasat du iđedisgukso guvlui.

₄Bajit čalmmiid, geahča birra:

Buohkat leat čoahkkanan,

sii bohtet du lusa,

du bártnit geat bohtet guhkkin,

du nieiddat geat guddojuvvojit salas.

₅Don oainnát buot dan ja báittát ilus,

du váibmu ravká, du raddi viidu,

go meara dávvirat šaddet du oapmin

ja álbmogiid riggodagat

addojuvvojit du gihtii,

₆go kamelaid eatnatvuohta,

Midjana ja Efa kamelavárssáid márra

gokčá du eatnama.

Buot Saba olbmot bohtet

golli ja suovvasat vel noađđin,

ja sii buohkat gulahit Hearrá gudni.

₇Kedara sávzaealut čoggojuvvojit

du lusa,

Nebajota vierccat leat du,

dat oaffaruššojuvvojit dohkálaš oaffarin

mu áltára alde.

Nu mun hearvásmahtán iežan tempela.

₈Nabai duot mat bohtet girddi

dego balvvat,

nugo duvvát vissoseaset – geat sii leat?

₉Gáiddus rittuid fatnasat čoagganit,

Taršiša-skiippat njunnošis.

Dat buktet du bártniid guhkkin,

buktet sin silbbaid ja golliid

Hearrá, du Ipmila, nama gudnin,

Israela Basi gudnin.

Son addá dutnje hearvásvuođa.

₁₀Vierrásat huksejit du muvrraid,

sin gonagasat bálvalit du.

Moaristan mun ráŋggáštin du,

muhto ráhkisvuođastan

mun du árpmihan.

₁₁Du poarttat orrot rabasin álelassii,

eai dat dahppojuvvo beaivet eaige ihkku.

Daid ráigge álbmogiid riggodagat

buktojuvvojit dutnje,

daid bokte gonagasat mieđuštuvvojit

du lusa.

₁₃Libanona riggodat

buktojuvvo du lusa,

sypressat, beazit ja buksbommuorat,

čiŋahit mu bassibáikki.

Mun gudnejahtán julggiidan saji.

₁₄Du sordiid bártnit bohtet ja gopmirdit

du ovdii,

ja buohkat geat leat badjelgeahččan du,

luoitádit du julggiid ovdii.

Sii gohččot du Hearrá gávpogin,

Sionin mii gullá Israela Bassái.

₁₅Ovdal don ledjet

hilgojuvvon ja duššášuvvon,

iige oktage galledan du.

Muhto mun dagan du agálaš goargun,

illun buolvvas bulvii.

₁₆Vieris álbmogat njamahit du,

gonagasat du bibmet,

ja dalle don ipmirdat

ahte mun, Hearrá, lean du beasti,

ahte du lonisteaddji lea Jakoba Veagalaš.

₁₇Mun buvttán dutnje golli

veaikki sadjái,

mun attán dutnje silbba

ruovddi sadjái,

veaikki muora sadjái

ja ruovddi geađggi sadjái.

Ráfi šaddá du eiseváldin,

vuoiggalašvuohta du fáldin.

₁₈Ii gullo šat veahkaváldi du eatnamis,

ii hearjideapmi iige billašupmi

du rádjemearkkaid siskelis.

Mu veahkki lea dus muvran

ja mu rámádus lea dus poartan.

₁₉Beaivváš ii leat šat du čuovgan beaivet

iige mánoheahpi šat čuvge du geainnuid,

muhto Hearrá lea du agálaš čuovga

ja du Ipmil lea du hearvásvuohta.

₂₀Du beaivváš ii šat eambbo luoitát

iige mánnu nuosa,

danin go Hearrá lea du agálaš čuovga.

Du moraštanáigi lea nohkan.

₂₁Dalle buot du olbmot leat

vanhurskásat,

sii atnet eatnama oapmineaset

agálaš áigái.

Sii leat vesát maid mun lean gilván,

mu gieđaid dahku mainna

mun čájehan iežan hearvásvuođa.

₂₂Unnimus šaddá duhát olbmo veahkan,

heajumusge veagalaš álbmogin.

Mun, Hearrá,

divttán dan šaddat fáhkkestaga,

go áigi lea boahtán.