Jakob 3

₁Vieljažiiddán, allet buohkat riema oahpaheaddjin, dasgo dii diehtibehtet ahte mii oahpaheaddjit dubmejuvvot garraseappot go earrásat. ₂Mii buohkat jorralit máŋgga dáfus. Dat gii ii jorral ságainis, lea dievaslaš: Son máhttá hálddašit oppa iežas rupmaša. ₃Jos bidjat hestii bákki, de dalle dat jeagada min ja mii nagodit jorgalit oppa heastta. ₄Velá stuorra skiippaidge maid garra biekkat dolvvodit, uhca stivrranaš jorgala dohko gosa stivrejeaddji dáhttu. ₅Maiddái njuovčča lea uhca lahtoš, muhto dat máhttá stuorástallat sakka. Smávva dolaš sáhttá buolláhit stuorra vuovddi! ₆Maiddái njuovčča lea dolla; min lahtuid searvvis dat lea vearrivuođa máilbmi. Dat nuoskkida oppa rupmaša ja cahkkeha eallima jođu, ja dola dat lea ožžon helvehis.

₇Buot elliid olmmoš sáhttá lodjudit ja lea maid lodjudan, njealjejuolggagiid, lottiid, njoammuid ja mearaelliid, ₈muhto njuokčama ii oktage olmmoš sáhte lodjudit; dat lea lodjutmeahttun ja bahá, dan dievva lea goddi mirko. ₉Njuokčamiin mii rámidit Hearrá ja Áhči, ja dainna mii maiddái garuhit olbmuid geat leat sivdniduvvon Ipmila govvan. ₁₀Seammá njálmmis boahtá rámádus ja garuhus. Vieljaidan, nu dat ii oaččo leat! ₁₁Sáhttágo seammá ádjagis golgat sihke buorre čáhci ja rihča čáhci? ₁₂Vieljaidan, sáhttetgo fiikonmuoras šaddat oliivvat dahje viidnemuoras fiikonat? Iige sálteádjagis golgga buorre čáhci.

₁₃Gii din searvvis lea viissis ja jierpmálaš? Buktos son iežas buori vádjolusa čájánassan daguid, vuollegaččat nugo jierbmeolmmoš dahká. ₁₄Muhto jos dis lea váimmus bahča gáđašvuohta ja bealkinmiella, de allet duohtavuođa vuostá rámpo iežadet viisodaga. ₁₅Dakkár viisodat ii boađe badjin, muhto dat lea eatnanlaš, oaččálaš, bahás vuoiŋŋaid viisodat. ₁₆Gos lea gáđašvuohta ja bealkinmiella, doppe lea maiddái moivi ja buotlágán bahá. ₁₇Muhto viisodat mii boahtá badjin, lea buhtis ja duddjo ráfi, dat lea láđis ja soabalaš, dan dievva lea váibmoláđisvuohta ja buorit šaddosat, dat lea bealátkeahttái iige dahkalutta. ₁₈Vanhurskkisvuohta gilvojuvvo ráfi dahkun, ja dat addá šaddosiid daidda geat ráfi dahket.