Duopmáriid girji 12

₁Efraimlaččat rávke olbmáideaset čoahkkái ja manne Jordana rastá Safonii. Sii dadje Jeftai: “Manin don it rávkan min fárrui, go vulget soahtat ammonlaččaiguin? Mii boaldit du viesu ja du oktan dainna.” ₂Jefta vástidii sidjiide: “Dalle go mun ja mu álbmot soađaimet garrasit ammonlaččaiguin, de mun rávken din, muhto dii ehpet boahtán gádjut mu sin gieđas. ₃Go mun oidnen ahte dii ehpet áigon veahkehit mu, de mun in beroštan iežan heakkas muhto vulgen soahtat ammonlaččaiguin, ja Hearrá attii sin mu gihtii. Manin dii dál lehpet vuolgán soahtat muinna?”

₄De Jefta čohkkii buot Gileada olbmáid, soahttái efraimlaččaiguin ja vuittii sin. Efraimlaččat lávejedje dadjat: “Dii gileadlaččat ehpet leat eará go báhtareaddjit Efraimis, din eananhan lea Efraima ja Manasse gaskkas.” ₅Gileadlaččat válde Jordana gállamiid maid bokte beasai Efraimii. Go efraimlaš báhtareaddjit bohte ja bivde beassat rastá, de gileadlaččat jerre juohkehaččas: “Leatgo don efraimlaš?” Jos olmmái biehttalii, ₆de sii gohččo su dadjat “šibbolet”. Jos son dajai “sibbolet”, danin go ii máhttán jietnadit riekta, de sii dohppejedje su ja godde. Jordana gállamiidda gahčče dalle njealljelogiguokteduhát efraimlačča.

₇Jefta lei Israela duopmárin guhtta jagi. De son jámii ja hávdáduvvui ruovttugávpogasas Gileadii.

₈Jefta maŋŋil Israela duopmárin lei betlehemlaš Ibsan. ₉Sus ledje golbmalogi bártni ja golbmalogi nieidda. Son náittii buot golbmalogi nieiddas soga olggobeallái ja válddii soga olggobealde golbmalogi nieidda bártniidasas áhkkán. Ibsan lei duopmárin čieža jagi. ₁₀De Ibsan jámii, ja son hávdáduvvui Betlehemii. ₁₁Su maŋŋil Israela duopmárin šattai sebulonlaš Elon. Son lei duopmárin logi jagi. ₁₂De Elon jámii, ja son hávdáduvvui Ajalonii Sebulona eatnamii. ₁₃Su maŋŋil Israela duopmárin lei piratonlaš Abdon, Hillela bárdni. ₁₄Sus ledje njealljelogi bártni ja golbmalogi áddjuba, ja sii riidejedje čiežainlogiin áseniin. Abdon lei duopmárin gávcci jagi. ₁₅De Abdon jámii, ja son hávdáduvvui Piratonii mii lea Efraima eatnamis amaleklaččaid várreeatnamis.