Duopmáriid girji 13

₁Israellaččat dahke fas dan mii lei bahá Hearrá čalmmiin, ja Hearrá attii sin filistalaččaid gihtii njealljelogi jahkái.

₂Soras lei muhtin Dana čeardda olmmái gean namma lei Manoah. Su áhkká lei sahkuheapme, eaige sus lean mánát. ₃De almmustuvai áhkkái Hearrá eŋgel ja dajai: “Mun dieđán ahte don leat sahkuheapme itge leat riegádahttán, muhto don šattat áhpeheapmin ja riegádahtát bártni. ₄Várut juhkamis viinni ja garra juhkamuša ja borramis maidege buhtismeahttumiid ₅go leat áhpeheapmin, danin go bárdni gean don riegádahtát, lea Ipmila nasira juo eatni goaŧu rájes, iige ráhkenniibi goassege oaččo guoskat su oaivái. Son beastigoahtá Israela filistalaččaid gieđas.”

₆Nisson manai muitalit boadnjásis: “Mu lusa bođii Ipmila olmmái. Son lei Ipmila eŋgela hápmásaš, hui suorggahahtti. Mun in jearran gos son bođii, iige son muitalan munnje iežas nama. ₇Son dajai munnje: Don šattat áhpeheapmin ja riegádahtát bártni. Ale juga viinni alege garra juhkamuša alege bora maidege buhtismeahttumiid, danin go bárdni lea Ipmila nasira eatni goaŧu rájes gitta jápminbeaivvis rádjái.”

₈Dalle Manoah rohkadalai Hearrá: “Hearrá, divtte dan Ipmila olbmá gean ledjet vuolggahan, boahtit vel muitalit munnuide maid moai galge dahkat, go bárdni riegáda.” ₉Ipmil gulai Manoaha rohkadusa, ja Ipmila eŋgel bođii ođđasis nissona lusa. Nisson lei dalle bealddus, muhto su boadnjá Manoah ii lean dalle das. ₁₀Nisson viehkalii dalán ruoktot ja muitalii boadnjásis: “Dat olmmái gii gieskat bođii mu lusa, almmustuvai fas munnje!” ₁₁Manoah vulggii áhkás mielde. Son manai olbmá lusa ja jearai: “Leatgo don dat olmmái gii sártnui mu áhkáin?” Son vástidii: “De lean.” ₁₂Manoah dajai: “Go du sánit ollašuvvet, de mo moai galge meannudit bártniin, ja maid moai galge dahkat sutnje?” ₁₃Hearrá eŋgel vástidii: “Du áhkká galgá dahkat visot maid mun lean gohččon su dahkat. ₁₄Son ii oaččo borrat maidege mii boahtá viidnemuoras. Son ii oaččo juhkat viinni iige garra juhkamuša iige borrat maidege buhtismeahttumiid. Son galgá váldit vuhtii buot maid mun lean gohččon su váldit vuhtii.” ₁₅Manoah dajai Hearrá eŋgelii: “Divtte munno ájihit du oanehaš, vai besse ráhkadit dutnje gihci.” ₁₆Muhto Hearrá eŋgel vástidii: “Vaikko don ájihivččetge mu, de mun in goit boraše du borramuša. Muhto jos don dáhtut, de ráhkat boaldinoaffara ja oaffaruša dan Hearrái.” Manoah ii diehtán ahte dat lei Hearrá eŋgel, ₁₇ja danin son jearai: “Mii lea du namma? Moai áigo gudnejahttit du go du sánit ollašuvvet.” ₁₈Hearrá eŋgel celkkii: “Manin don jearat mu nama? Mu namma lea ovddolaš.”

₁₉De Manoah vieččai gihci ja borramušoaffara ja oaffarušai daid bávtti alde Hearrái. Hearrá divttii dáhpáhuvvat ipmaša, dan botta go Manoah ja su áhkká geahčadeigga: ₂₀ Go dollanjuokčamat badjánedje áltáris almmi guvlui, de Hearrá eŋgel badjánii oktan dollanjuokčamiiguin. Go Manoah ja su áhkká oinniiga dan, ja soai luoitádeigga muđolassii eatnamii. ₂₁Hearrá eŋgel ii šat almmustuvvan Manoahii iige su áhkkái. Manoah ipmirdii dál ahte olmmái lei Hearrá eŋgel, ₂₂ja son dajai áhkkásis: “Dál moai gal jápme, go letne oaidnán Ipmila.” ₂₃Muhto su áhkká dajai: “Jos Hearrá livččii dáhtton goddit munno, de ii son livčče váldán munnos boaldinoaffara iige borramušoaffara, iige son livčče diktán munno oaidnit iige gullat buot dán.”

₂₄Nisson riegádahtii bártni ja gohčodii su Samsonin. Bárdni rávásmuvai, ja Hearrá buressivdnidii su. ₂₅Hearrá vuoigŋa ádjigođii su go son lei Dana siiddas, Sora ja Eštaola gaskkas.