Duopmáriid girji 14
Samsona heajat
1Oktii Samson manai Timnai ja oinnii doppe filistalaš nieidda. 2Go son bođii ruoktot, de son muitalii áhččásis ja eadnásis: “Mun oidnen Timnas filistalaš nieidda. Váldi su munnje áhkkán!” 3Su áhčči ja eadni dajaiga sutnje: “Iigo du iežat sogas dahje oppa min álbmogis leat dutnje oktage nisson, go don áiggut vuolgit áhká váldit birračuohpakeahtes filistalaččaid gaskkas?” Muhto Samson dajai áhččásis: “Váldde su munnje áhkkán, sutnje mun lean gesson.” 4Su vánhemat eaba ipmirdan ahte dat lei Hearrá dáhttu, ja ahte Hearrá lei oččodeamen riidalanášši filistalaččaiguin. Filistalaččat oainnat ráđđejedje dalle Israela.
5Samson vulggii vánhemiiddisguin Timnai. Go sii ledje joavdan Timna viidnegárddiid lusa, de bođii ledjon čearggu Samsona ovddal. 6Dalle Hearrá vuoigŋa bođii Samsona badjelii, ja son gaikkodii ledjona báljes gieđaiguin dego dat livččii leamaš gihcci. Muhto vánhemiiddásis son ii muitalan maid lei dahkan. 7De son manai gávpogii ja sártnodii nieiddain, ja son liikui niidii sakka.
8Muhtin áiggi geažes Samson vulggii fas Timnai, vai beassá váldit nieidda áhkkán. Son earránii bálgás geahččat ledjona ráppi ja oinnii ahte dan siste lei mieđašeatnemoahti ja honnet. 9Son faskkui honnega gieđaidasas ja borai dan váccedettiin. Go son bođii vánhemiiddis lusa, de son attii sudnuidege honnega, ja soai boraiga. Muhto son ii muitalan sudnuide ahte lei faskon honnega ledjona gorudis.
10Samsona áhčči manai nieidda ruktui, ja Samson lágidii doppe feastta, nugo nuorra olbmát lávejedje dahkat. 11Go timnalaččat oidne ahte Samson lei boahtán, de sii válljejedje golbmalogi headjaolbmá orrut suinna. 12Samson dajai sidjiide: “Mun bijan didjiide árvidepmoša. Jos dii árvidehpet dan dán headjavahku áigge, de mun attán didjiide golbmalogi liidnebáiddi ja golbmalogi ávvubiktasa. 13Muhto jos dii ehpet árvit, de dii galgabehtet addit munnje golbmalogi liidnebáiddi ja golbmalogi ávvubiktasa.” Sii celke: “Muital árvidepmošat, miihan guldalit!” 14Samson dajai sidjiide:
“Bođii borešis borramuš,
bođii gievrra siste njálggat.”
Golmma beaivvi geažes sii eai lean vel árvidan árvidepmoša. 15Njealját beaivvi sii dadje Samsona áhkkái: “Fille boatnját čilget midjiide árvidepmoša, muđui mii boaldit du áhči viesu ja du oktan dainna. Vai lehpetgo dii bovden min deike dan nammii ahte beassabehtet speadjat min?” 16Samsona áhkká manai čieru boatnjás lusa ja dajai: “Donhan vašuhat mu itge ráhkis! Don bidjet mu álbmogii árvidepmoša, muhto it čilge dan munnje.” Samson vástidii: “Mun in leat čilgen dan in áhččásan inge eadnásange. Dutnjego mun dalle galggašin čilget dan?” 17Áhkká čierui ja vuorjjai Samsona heajaid čihččet beaivvi rádjái. Go áhkká vuorjjai su nu sakka, de čihččet beaivvi son viimmat čilgii árvidepmoša áhkkásis. Áhkká muitalii čilgehusa iežas álbmoga olbmuide, 18ja čihččet beaivvi ovdal go beaivváš luoitádii, gávpoga olbmát dadje Samsonii:
“Mii njálgát go honnet,
mii gievrrat go ledjon?”
Samson dajai sidjiide:
“Jos dii ehpet livčče jorgon mu guigguin,
de ehpet livčče árvidan mu árvidepmoša.”
19De Hearrá vuoigŋa bođii Samsona badjelii. Son manai Aškelonii ja časkkii doppe jámas golbmalogi olbmá, nuolai sis biktasiid ja attii daid daidda geat ledje čilgen árvidepmoša. Moaris son vulggii ruoktot. 20Muhto Samsona áhkká náitojuvvui Samsona lagamus headjaolbmái.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
