Hearrá várrehusat
1Hearrá celkkii munnje: Mana Juda gonagasa šlohttii ja sártno doppe ná: 2Gullet Hearrá sáni! Son cealká dán dutnje, Juda gonagas, gii čohkkát Davida truvnnus, du bálvaleddjiide ja du álbmogii, didjiide buohkaide geat mannabehtet sisa dáid poarttaid ráigge: 3Dahket dan mii lea riekta ja vuoigat! Gádjot stajiduvvon olbmo soardi gieđas. Allet vealat vierrásiid, oarbásiid alletge leaskkaid, allet daga veahkaválddi geasage. Allet golggat vigihis vara dán báikkis. 4Jos dii doahttalehpet mu sáni, de gonagasat geat čohkkájit Davida truvnnus bohtet sisa dán viesu poarttaid ráigge. Sii bohtet oktan bálvaleddjiideasetguin, vovnnaiguin ja heasttaiguin vuoji, ja maiddái sin álbmot boahtá deike. 5Muhto jos dii ehpet gula maid mun sártnun didjiide, de dát viessu duššaduvvo. Dan mun vuortnun iežan bokte, cealká Hearrá. 6Ná cealká Hearrá Juda gonagasvissui:
Don leat leamaš munnje dego Gilead,
nugo Libanona čohkka,
muhto mun dagan du meahccin,
gávpogin gos olbmot eai ása.
7Mun vihahan hearjideddjiid fallehit du.
Sii bohtet vearjjut gieđas,
njeidet du válljusederiid
ja bálkestit daid dollii.
8Ollu álbmogiid olbmot mannet dán gávpoga meaddel ja jearahit: “Manne Hearrá lea dahkan dán láhkai dán stuorra gávpogii?” 9Sii ožžot dán vástádusa: “Dan ássit hilgo Hearrá, Ipmileaset, lihtu. Sii rohkadalle ja bálvaledje eará ipmiliid.”
Vuoi gonagas Šalluma!
10Allet čiero jábmi, allet moraš su. Čirrot baicce su gii manná eret, gii ii máhca šat ruoktot iige beasa šat oaidnit dan eatnama gos riegádii. 11Dasgo ná cealká Hearrá Juda gonagasa Šalluma, Jošia bártni, birra, gii šattai gonagassan áhčis Jošia maŋŋil ja dolvojuvvui eret dán eatnamis: Son ii šat máhca deike. 12Son jápmá dohko gosa lea dolvojuvvon fáŋgan, iige son šat goassege oainne dán eatnama.
Vuoi gonagas Jojakima!
13Vuoi su gii ii hukse
iežas viesu vanhurskkisvuođain,
loktalanjas vearrivuođain.
Don barggahat lagamuččat nuvttá
itge atte sutnje su bálkká.
14Don dajat: “Mun huksen alccesan
stuorra viesu, saddjás loktalanjaid,
ráhkadahtán vissosan ihkkoniid,
skoađastan dan sedermuorain
ja málen ruoksadin.”
15Datgo dahká du gonagassan,
ahte goarggastalat sederfielluiguin?
Almma du áhččige borai ja jugai gallás,
muhto dattetge son dagai dan
mii lea vuoigat ja riekta,
ja danin sutnje geavai bures.
16Son rábidii vuoigatvuođa
vártnuheapmái ja váivvášii –
dalle visot lei buorre.
Dat gii dahká ná,
dat dovdá mu, cealká Hearrá.
17Muhto du čalmmit ja váibmu
bivdet dušše du iežat vuoittu,
vigihis vara golggaheami,
soardima ja veahkaválddi.
18Danne Hearrá cealká ná
Juda gonagasa Jojakima,
Jošia bártni, birra:
Ii oktage moraš su iige čuorvvo:
“Vuoi vieljažan! Vuoi oappážan!”
Ii oktage moraš su iige čuorvvo:
“Vuoi hearrážeamet!
Vuoi su hearvásvuođa!”
19Son hávdáduvvo dego ásen,
su rumaš gessojuvvo ja suhppejuvvo
olggos Jerusalema poarttain.
Vuoi Jerusalema!
20Goarkŋo Libanonii ja bárggo,
divtte jienat skádjat Bašanis,
huikke Abarimváriin,
dasgo buot du ráhkisteaddjit
leat skálmmastuvvon!
21Mun sárdnon dutnje dalle go don
ain ellet oadjebassan,
muhto don dadjet: “Mun in guldal!”
Dat lei dus vierrun
gitta nuorravuođat rájes,
don biehttalit guldaleames mu jiena.
22Riđđu doalvu buot du báimmaniid,
du ráhkisteaddjit dolvojuvvojit fáŋgan.
Dalle don oaččut heahpada ja bilkku
bálkán buot bahávuođastat.
23Don ásat dál dego Libanonis,
leat ráhkadan beasi sedermuoraide.
Mo don šattatge dalle luoibmat
go dohppehalat bákčasiidda,
dego riegádahtti nissona ávttaide!
Vuoi gonagas Jojakina!
24Nu duohta go mun ealán, cealká Hearrá: Vaikko don, Konja, Juda gonagas, Jojakima bárdni, livččet seailasuorpmas mu olgeš gieđas, de dasge mun gaikkihivččen du eret. 25Mun attán du Babylona gonagasa Nebukadnesara ja kaldealaččaid gihtii, daid geat bivdet du heakka ja geain don balat. 26Mun suhppen vieris eatnamii du ja du eatni gii riegádahtii du. Doppe doai eahppi riegádan, muhto dohko doai jápmibeahtti. 27Muhto dán eatnamii gosa doai áibbašeahppi, doai eahppi máhca šat goassege. 28Leago dát olmmái, Konja, badjelgeahčahas, cuvkejuvvon láirálihtti mas ii oktage fuola? Manne son ja su nálli leat bálkestuvvon guhkás, suhppejuvvon dakkár eatnamii maid sii eai dovdda? 29Eanan, eanan, eanan, gula Hearrá sáni! 30Ná cealká Hearrá: Čálit dán olbmá mánáheapmin, olmmájin gean eallimis ii leat mihkkege lihkuid. Ii oktage su nális šat eambbo ane lihku čohkkát Davida truvnnus ja ráđđet Juda.
