Jeremia 37

₁Babylona gonagas Nebukadnesar bijai Juda gonagassan Sidkia, Jošia bártni. Son šattai gonagassan Konja, Jojakima bártni maŋŋil. ₂Muhto Sidkia, su bálvaleaddjit ja eatnama álbmot eai guldalan daid sániid maid Hearrá sártnui profehta Jeremia bokte.

₃Gonagas Sidkia vuolggahii Jukala, Šelemja bártni, ja báhppa Sefanja, Maaseja bártni, Jeremia lusa bivdit: “Rohkadala datte min ovddas Hearrá, min Ipmila!” ₄Dalle Jeremia beasai ain johtalit olbmuid gaskkas nugo dáhtui; son ii lean velá biddjojuvvon giddagassii. ₅Daid áiggiid farao soahteveahka lei johttán Egyptas, ja go kaldealaččat geat ledje birastahttimin Jerusalema, gulle dan, de sii geassádedje Jerusalema lahkosiin. ₆De bođii profehta Jeremiai dát Hearrá sátni: ₇Ná cealká Hearrá, Israela Ipmil: Juda gonagas lea vuolggahan daid olbmáid jearrat mus rávvaga. Gohčo sudno mannat muitalit gonagassii: Farao soahteveahka mii lea vuolgán didjiide veahkkin, máhccá fas eatnamasas Egyptii. ₈Kaldealaččat bohtet fas birastahttit dán gávpoga, sii váldet dan ja boldet dan. ₉Ná cealká Hearrá: Allet beahte iežadet ja daja: “Kaldealaččat vulget áŧesteames min.” Eai sii vuolgge! ₁₀Ja vaikko dii vuoittášeiddet oppa kaldealaččaid soahteveaga mii soahtá dinguin, ja sis bázášedje dušše moadde hávvádahtton olbmá, de sii čuožžilivčče, iešguhtege goađistis, ja boalddášedje dán gávpoga.

₁₁Go kaldealaččaid soahteveahka lei geassádan Jerusalema luhtte farao soahteveaga geažil, ₁₂de Jeremia áiggui vuolgit gávpogis Benjamina eatnamii, vai beassá váldit oasis iežas soga árbeeatnamis. ₁₃Muhto go Jeremia bođii Benjaminportii, de fávttaid oaivámuš Jeria, Šelemja bárdni, Hananja áddjut, dohppii su ja dajai: “Don áiggut mannat kaldealaččaid beallái!” ₁₄Jeremia vástidii: “Dat lea gielis! In mun áiggo mannat kaldealaččaid beallái.” Jeria ii jáhkkán Jeremiai, muhto válddii su gitta ja doalvvui su oaivámuččaid lusa. ₁₅De oaivámuččat moaráhuvve Jeremiai, cápme su ja bidje su čálli Jonatana vissui mii lei dahkkojuvvon giddagassan. ₁₆Nu Jeremia gárttai giddagassii, fáŋgaroggái, ja doppe son gárttai leat guhká.

₁₇De gonagas Sidkia vieččahii Jeremia lusas ja jearai sus suollemasat: “Leago dutnje boahtán sátni Hearrás?” Jeremia vástidii: “De lea. Don addojuvvot Babylona gonagasa gihtii!” ₁₈De son dajai gonagas Sidkiai: “Maid baháid mun lean dahkan dutnje ja du bálvaleddjiide ja dán álbmogii, go dii lehpet bidjan mu giddagassii? ₁₉Ja gos dál leat profehtat geat profehtastalle didjiide ja celke: Babylona gonagas ii boađe dán eatnamii iige fallet din? ₂₀Hearrán gonagas, gula datte mu vuollegis rohkadusa alege vuolggat mu ruoktot čálli Jonatana vissui. Ale divtte mu jápmit dohko!” ₂₁Dalle Sidkia gohčui doallat Jeremia fáŋgan fáktašiljus. Doppe son oaččui juohke beaivvi láibbi Láibuidgujis, gitta dassážii go gávpogis buot láibi lei loktojuvvon. Ja Jeremia gárttai orrut fáktašiljus.