Jeremia 39

₁Juda gonagasa Sidkia ovccát ráđđenjagi, dan logát mánus, bođii Babylona gonagas Nebukadnesar oppa soahteveagainis Jerusalema ovdii ja birastahttigođii gávpoga. ₂Sidkia oktanuppelogát ráđđenjagi njealját mánu ovccát beaivvi, kaldealaččat gaiko gávpotmuvrra čađa. ₃Go gávpot lei váldojuvvon, de bohte buot Babylona gonagasa oaivámuččat ja čohkánedje Gaskaportii. Sin searvvis ledje soahteveaga oaivámuš Nergal-Sareser, hoavvaolbmáid oaivámuš Nebu-Sarsekim ja buot eará Babylona gonagasa oaivámuččat. ₄Go Juda gonagas Sidkia ja su soahteolbmát oidne sin, de sii báhtaredje gávpogis ihkku. Sii besse báhtui gonagasa gilvvagárddi bokte dan poartta ráigge mii lei guovtti muvrra gaskkas, ja dollejedje Jordanleagi guvlui. ₅Muhto kaldealaččaid soahteveahka doarridii sin ja juvssai Sidkia Jeriko duolbadasas. Babylonialaččat válde Sidkia gitta ja dolvo su gonagas Nebukadnesara ovdii Riblai, Hamata eatnamis. Doppe Nebukadnesar celkkii duomu fáŋggaidasas. ₆Babylonia gonagas gottihii Sidkia bártniid sin áhči oaidnut. Maiddái buot Juda oaivámuččaid Nebukadnesar gottihii. ₇Dasto son gohčui čalmmehuhttit Sidkia, čatnat su bronsaláhkkiiguin ja doalvut su Babylonii. ₈Kaldealaččat bolde gonagasa šloahta ja Jerusalema ássiid viesuid, ja Jerusalema muvrraid sii gaiko eatnamii. ₉Heaggafávttaid oaivámuš Nebusaradan doalvvui Babylonii álbmoga bázahasa mii ain lei Jerusalemis, sihke daid geat ledje mannan Babylona gonagasa beallái ja daid geat ledje báhcán gávpogii. ₁₀Dušše muhtun geafes olbmuid geain ii lean mihkkege, Nebusaradan guđii Judai, ja son attii sidjiide viidnegárddiid ja bealdduid.

₁₁Babylonia gonagas Nebukadnesar lei gohččon Nebusaradana, heaggafávttaid oaivámučča: ₁₂“Oza Jeremia ja ane sus fuola! Ale daga sutnje maidege baháid. Daga sutnje dušše dan maid son ieš dadjá.” ₁₃Heaggafávttaid oaivámuš Nebusaradan, hoavvaolbmáid oaivámuš Nebušasban, soahteveaga oaivámuš Nergal-Sareser ja buot Babylona gonagasa oaivámuččat ₁₄vieččahedje Jeremia fáktašiljus. Sii adde su Gedalja, Ahikama bártni, Šafana áddjuba, háldui, vai son válddášii su vissosis. Nu Jeremia orui álbmoga gaskkas.

₁₅Jeremiai bođii dát Hearrá sátni dalle go son ain lei fáŋgan fáktašiljus: ₁₆Mana nubialaš Ebed-Meleka lusa ja daja sutnje: Ná cealká Hearrá, Almmiveagaid Ipmil, Israela Ipmil: Mun ollašuhtán dál sániidan dán gávpogii oasehisvuohtan inge buorrin. Dat dáhpáhuvvá du čalmmiid ovddas dan beaivvi. ₁₇Muhto du mun gájun dan beaivvi, cealká Hearrá. Don it šatta daid olbmáid gihtii geain balat. ₁₈Mun beasttán du itge don gahča miehkkái, muhto gájut heakkat, danne go don dorvvastit munnje, cealká Hearrá.