Jeremia 45

₁Dáid sániid profehta Jeremia sártnui Barukii, Neria bárdnái, Juda gonagasa Jojakima, Jošia bártni, njealját ráđđenjagi. Baruk čálii daid girjái Jeremia sánuheami mielde. ₂Ná cealká Hearrá, Israela Ipmil, du birra, Baruk: ₃Don dajat: “Vuoi mu! Hearrá lasiha bákčasa mu gihpui. Mun lean váiban šuohkkimis, mun in gávnna mášu.” ₄Mun, Hearrá, gohčun Jeremia dadjat dutnje ná: Dan maid lean huksen, mun gaikkodan, daid maid lean ceggen, mun gaikkun eret; dát guoská oppa eatnamii. ₅Don bivddát stuorra áššiid! Ale bivdde, danin go mun, Hearrá, divttán oasehisvuođa deaividit buot olbmuid. Muhto du mun divttán bissut heakkas, gosa ihkinassii manažat.