Jeremia 47

₂Ná cealká Hearrá:

Čázit badjánit davvin

ja šaddet dulveeatnun;

dat gokčet eatnama ja buot mii das lea,

gávpogiid ja daid ássiid.

Olbmot bárgot,

buot eatnama ássit luibmet.

₃Jo gullo oriid gazzadeapma,

vovnnaid ruohča, juvllaid jupma.

Áhčit eai gájo mánáideaset,

sin gieđat leat njuorran.

₄Boahtán lea beaivi

mii duššada buot filistalaččaid.

Ii báze oktage veahkehit Tyrosa ja Sidona.

Hearrá duššada filistalaččaid,

maŋimušaidge dain

geat bohte Kaftora gáttiin.

₅Gaza ráhke oaivvis báljisin,

Aškelon jávohuvvá.

Dii anaklaččaid bázahas,

man guhká dii áigubehtet nájadit?

₆Vuoi, Hearrá miehkki,

itgo juo heaitte?

Máhca dohppasat,

mášuiduva ja oro lotka!

₇Mo dat sáhttá mášuiduvvat go

Hearrá lea dan gohččon?

Miehkki galgá časkit

Aškelona ja mearragátti.