Johannes 4

₁Go Jesus bođii diehtit ahte farisealaččat ledje gullan ahte son čohkkii eambbo máhttájeddjiid ja gásttašii eanebuid go Johannes – ₂vaikko Jesus ieš ii gásttašan, muhto su máhttájeaddjit – ₃de son vulggii Judeas ja manai fas Galileai. ₄Son fertii vádjolit Samaria čađa. ₅Mátkkis Jesus bođii gávpogii man namma lei Sykar. Dan lahka lei eananbihtá maid Jakob lei addán bárdnásis Josefii, ₆ja doppe lei Jakoba gáivo. Jesus lei váiban mátkkis ja čohkánii gáivvo gurrii. Lei gaskabeaivi, guđát diimmu lahka.

₇De bođii muhtun samarialaš nisson viežžat čázi, ja Jesus celkkii sutnje: “Atte munnje juhkat.” ₈Máhttájeaddjit ledje mannan gávpogii oastit borramuša. ₉Nisson dajai: “Mo don gii leat juvddálaš, bivddát juhkamuša mus, samarialaš nissonis?” Dasgo juvddálaččat eai guoibmádala samarialaččaiguin. ₁₀Jesus celkkii nissonii: “Jos don dovddašit Ipmila attáldaga ja dieđášit gii dus bivdá juhkamuša, de don ieš bivddášit sus, ja son attášii dutnje ealli čázi.” ₁₁Nisson dajai: “Hearrá, iihan dus leat lihtti, ja gáivo lea čieŋal. Gos don dalle válddát dan ealli čázi? ₁₂It suige don leat stuorit go min áhčči Jakob geas mii leat ožžon dán gáivvo? Son ieš jugai dán gáivvo čázi, ja maiddái su bártnit ja šibihat.” ₁₃Jesus vástidii sutnje: “Gii juhká dán čázi, dat goiká fas. ₁₄Muhto gii juhká dan čázi maid mun attán, dat ii goikka šat goassege. Dat čáhci maid mun attán, šaddá su siste ájan mii álo golgá ja addá agálaš eallima.” ₁₅Nisson dajai: “Hearrá, atte munnje dan čázi, vai mun in goassege šat goikka inge dárbbaš dáppe viežžat čázi.”

₁₆Jesus celkkii sutnje: “Mana viežžat iežat boatnjá.” ₁₇Nisson vástidii: “Ii mus leat boadnjá.” Jesus celkkii: “Don sárdnot duođa go dadjet ahte dus ii leat boadnjá. ₁₈Vihtta boatnjá dus leat leamaš, ja dat gii dus dál lea, ii leat du boadnjá. Das don sárdnot duođa.” ₁₉Nisson dajai: “Hearrá, mun oainnán ahte don leat profehta. ₂₀Min áhčit leat rohkadallan Ipmila dán váris, muhto dii dadjabehtet ahte Jerusalemis lea rievttes báiki rohkadallat.” ₂₁Jesus vástidii: “Jáhke munnje, nisson, áigi boahtá go dii ehpet rohkadala Áhči dán váris ehpetge Jerusalemis. ₂₂Dii rohkadallabehtet dan maid ehpet dovdda, muhto mii rohkadallat dan maid dovdat, danin go bestojupmi boahtá juvddálaččain. ₂₃Muhto áigi boahtá, ja dat lea dál juo, goas duohta rohkadallit rohkadallet Áhči vuoiŋŋas ja duohtavuođas. Dakkár rohkadalliid Áhčči dáhttu. ₂₄Ipmil lea vuoigŋa, ja dat geat rohkadallet su, galget rohkadallat vuoiŋŋas ja duohtavuođas.” ₂₅Nisson dajai: “Mun dieđán ahte Messias boahtá,” – Messias lea seammá go Kristus – “ja go son boahtá, de son almmuha midjiide buot.” ₂₆Jesus celkkii: “Mun dat lean, mun gii sártnun duinna.”

₂₇Aiddo dalle bohte su máhttájeaddjit. Sii imaštalle dan go Jesus lei sárdnumin nissoniin, muhto ii oktage jearran maid son dáhtui dahje manne son sártnui nissoniin. ₂₈Nisson guđii čáhcelihtis dasa, manai gávpogii ja dajai olbmuide: ₂₉“Bohtet geahččat olbmá gii lea muitalan munnje buot maid mun lean dahkan. Leažžágo son Messias?” ₃₀De olbmot vulge gávpogis ja bohte Jesusa lusa.

₃₁Dan botta máhttájeaddjit dadje Jesusii: “Rabbi, bora!” ₃₂Son vástidii: “Mus lea borramuš maid dii ehpet dovdda.” ₃₃Sii árvaledje guhtet guimmiineaset: “Leagoson muhtin buktán sutnje borramuša?” ₃₄Muhto Jesus celkkii: “Mu borramuš lea dat ahte mun dagan su dáhtu gii lea mu vuolggahan, ja ollašuhtán su dagu. ₃₅Dii dadjabehtet: Njeallje mánu vel, ja de boahtá láddjenáigi. Muhto mun cealkkán didjiide: Gehččet! Bealddut leat juo vilggodan láddjenmuddui. ₃₆Láddjejeaddji oažžu bálkkás dál juo, son rádjá šattuid agálaš eallimii, vai gilvi beassá illudit ovttas láddjejeddjiin. ₃₇Dás lea duohta dát sátni: ‘Nubbi gilvá, nubbi láddje.’ ₃₈Mun lean vuolggahan din láddjet dan maid ehpet leat bargan. Earrásat leat bargan, muhto dii beassabehtet láddjet sin barggu šattu.”

₃₉Eatnagat dan gávpoga samarialaččain osko Jesusii go ledje gullan nissona duođašteamen: “Son muitalii munnje visot maid lean dahkan.” ₄₀Go samarialaččat bohte Jesusa lusa, de sii dáhtto su orrut iežaset luhtte, ja son orui doppe guokte beaivvi. ₄₁Ollu eanebut oskugohte Jesusii go gulle su sániid, ₄₂ja sii dadje nissonii: “Dál mii eat oskko šat dušše du sániid dihte. Mii leat ieža gullan su ja diehtit ahte son duođaid lea máilmmi beasti.”

₄₃Guovtte beaivvi geažes Jesus dasto vulggii Galileai. ₄₄Son lei ieš duođaštan ahte profehta ii adnojuvvo árvvus iežas ruovttuguovllus, ₄₅muhto go son bođii Galileai, de galilealaččat válde su bures vuostá. Sii ledje maid ávvudan basiid Jerusalemis ja oaidnán maid Jesus lei dahkan doppe basiid botta.

₄₆Jesus bođii fas Kanai Galileas, gos son lei dahkan čázi viidnin. Kapernaumis ásai gonagasa virgeolmmái gean bárdni lei buohcamin. ₄₇Go son gulai ahte Jesus lei boahtán Judeas Galileai, de son vulggii Jesusa lusa ja siđai su boahtit buoridit iežas bártni gii lei juo jápmimin. ₄₈Jesus celkkii sutnje: “Dii ehpet oskko, jos ehpet oainne mearkkaid ja oavdduid.” ₄₉Muhto virgeolmmái dajai: “Hearrá, boađe ovdal go mu bárdni jápmá!” ₅₀Dalle Jesus celkkii: “Vuolgge ruoktot. Du bárdni eallá.” Olmmái oskkui Jesusa sániide ja vulggii. ₅₁Go son lei mátkkis ruoktot, de bohte su bálvaleaddjit su ovddal ja muitaledje ahte su bárdni lei eallimin. ₅₂Olmmái jearai sis, goas bárdni lei buorránišgoahtán, ja sii dadje: “Ikte čihččet diimmus dávda vulggii sus.” ₅₃Dalle áhčči ipmirdii ahte dat lei dáhpáhuvvan aiddo dalle go Jesus celkkii sutnje: “Du bárdni eallá”, ja son ja buot su dálu olbmot osko. ₅₄Dát lei Jesusa nubbi mearka, ja son dagai dan go lei boahtán Judeas Galileai.