Johannes 5

₁Das maŋŋil ledje juvddálaččaid basit, ja Jesus vulggii Jerusalemii. ₂Jerusalemis lea Sávzapoartta lahka láttu man hebreagiel namma lea Betesda. Dan birra leat vihtta bázzehálla, ₃ja dain veallájedje ollu buohccit: čalmmeheamit, lápmásat ja rámbbit. Sii vurde ahte čáhci lihkahuvvo. ₄Hearrá eŋgel oainnat njiejai vissis áiggiid láddui ja lihkahii čázi, ja dat gii vuosttažin njiedjalii láddui go čáhci lei lihkahuvvon, dearvvašmuvai, leaččai sus dal mii ihkinassii dávddaid.

₅Das lei olmmái gii lei buohcan golbmalogigávcci jagi. ₆Jesus oinnii su veallámin das ja diđii ahte son lei buohcan guhká. Jesus jearai: “Dáhtutgo don dearvvašmuvvat?” ₇Buohcci vástidii: “Hearrá, mus ii leat olmmoš gii veahkehivččii mu láddui go čáhci lihkahuvvo. Ja go mun boađán, de muhtin eará háhppeha njiedjat láddui mu ovdal.” ₈Jesus celkkii sutnje: “Čuožžil, váldde seaŋggat ja vázzil.” ₉Olmmái dearvvašmuvai dallánaga, válddii seaŋggas ja vázzilii.

Muhto dat beaivi lei sabbat. ₁₀Juvddálaččat dadje dasa gii lei buoriduvvon: “Odne lea sabbat, dus ii leat lohpi guoddit seaŋggat.” ₁₁Olmmái vástidii: “Dat gii buoridii mu, celkkii munnje: Váldde seaŋggat ja vázzil.” ₁₂Dalle juvddálaččat jerre: “Gii lei dat olmmái gii gohčui du váldit seaŋggat ja vázzilit?” ₁₃Dat gii lei buoriduvvon ii diehtán gii dat lei. Jesus lei mannan das eret, danin go dan báikkis ledje ollu olbmot. ₁₄Maŋŋil Jesus deaivvai olbmá tempelis ja celkkii sutnje: “Don leat dál dearvvaš. Ale šat suddut, vai ii mihkkege bahábuid dáhpáhuva dutnje.” ₁₅Olmmái vulggii das ja muitalii juvddálaččaide ahte Jesus lei su buoridan.

₁₆Juvddálaččat doarrádallagohte Jesusa, danne go son dagai dakkára sabbahin. ₁₇Muhto Jesus celkkii sidjiide: “Mu Áhčči bargá heaittekeahttá, ja danin maiddái mun barggan.” ₁₈Dan dihte juvddálaččat bivde vel sakkabut goddit su. Sonhan ii dušše rihkkon sabbaha, muhto gohčodii Ipmila iežas áhččin ja nu dagai iežas Ipmila veardásažžan.

₁₉Jesus vástidii juvddálaččaide ná: “Duođaid, duođaid, mun cealkkán didjiide: Ii Bárdni sáhte dahkat maidege iešalddis, son dahká dušše dan maid oaidná Áhči dahkamin. Maid Áhčči dahká, dan dahká maid Bárdni. ₂₀Áhčči ráhkista Bártni ja čájeha sutnje buot maid son ieš dahká. Son čájeha Bárdnái velá stuorit daguid, dakkáriid maid dii ovddošehpet. ₂₁Nugo Áhčči čuoččáldahttá jábmiid ja dahká sin eallin, nu maiddái Bárdni dahká eallin daid geaid dáhttu. ₂₂Ii Áhčči dubme ovttage, muhto son lea addán buot dubmenválddi Bárdnái, ₂₃vai buohkat gudnejahttet Bártni nugo sii gudnejahttet Áhči. Dat gii ii gudnejahte Bártni, ii gudnejahte Áhčige gii lea vuolggahan su.

₂₄Duođaid, duođaid, mun cealkkán didjiide: Das gii gullá mu sáni ja osku sutnje gii lea vuolggahan mu, lea agálaš eallin. Son ii šatta dubmejuvvot, muhto lea mannan jápmimis eallimii. ₂₅Duođaid, duođaid, mun cealkkán didjiide: Boahtá áigi, ja dat lea dál juo, go jábmit gullet Ipmila Bártni jiena. Dat geat dan gullet, ožžot eallit. ₂₆Nugo Áhčči ieš lea eallima ája, nu son lea dahkan Bártnige eallima ájan. ₂₇Áhčči lea maid addán sutnje dubmenválddi, danne go son lea Olbmobárdni. ₂₈Allet imaštala dán. Boahtá áigi go buohkat geat leat hávddiin, gullet su jiena. ₂₉Sii čuožžilit hávddiineaset; dat geat leat dahkan buriid, eallima bajásčuožžileapmái, ja dat geat leat dahkan baháid, duomu bajásčuožžileapmái. ₃₀In mun sáhte iešalddán dahkat maidege. Mun dubmen nugo mun gulan, ja mu duopmu lea vuoigatlaš. Dasgo mun in dáhto ovddidit iežan dáhtu, muhto su dáhtu guhte lea vuolggahan mu.

₃₁Jos mun ieš duođaštan iežan birra, de mu duođaštus ii leat dohkálaš. ₃₂Muhto mu birra duođašta soames eará, ja mun dieđán ahte su duođaštus mu birra lea dohkálaš. ₃₃Dii vuolggaheiddet olbmuid Johannesa ságaide, ja son duođaštii duohtavuođa beali. ₃₄In mun dárbbaš ovttage olbmos duođaštusa, muhto cealkkán dán vai dii bestojuvvošeiddet. ₃₅Johannes lei buolli ja báiti lámpá, muhto dii dáhtuidet dušše muhtin áiggi ávvudit su čuovggas.

₃₆Mus lea duođaštus mii lea nannoseabbo go Johannesa duođaštus: dagut maid Áhčči lea addán munnje ollašuhttit. Dat dagut maid mun dagan, duođaštit ahte Áhčči lea vuolggahan mu. ₃₇Maiddái Áhčči ieš gii lea vuolggahan mu, lea addán duođaštusa mu birra. Dii ehpet leat goassege gullan su jiena ehpetge oaidnán su muođuid. ₃₈Su sátni ii biso din siste, dasgo dii ehpet oskko sutnje gean son lea vuolggahan. ₃₉Dii guorahallabehtet čállagiid, danne go gáddibehtet dain gávdnat agálaš eallima. Ja aiddo dat duođaštit mu birra. ₄₀Muhto dii ehpet dáhto boahtit mu lusa oažžut eallima.

₄₁Mun in váldde vuostá gudni olbmuin. ₄₂Mun dovddan din ja dieđán ahte din siste ii leat ráhkisvuohta Ipmilii. ₄₃Mun lean boahtán Áhččán nammii ehpetge dii váldde mu vuostá. Muhto jos muhtun eará boahtá iežas nammii, de su dii gal váldibehtet vuostá. ₄₄Mo dii sáhttibehtet oskut, dii geat váldibehtet vuostá gudni guhtet guoimmisteattet ehpetge oza dan gudni mii boahtá áidna Ipmilis. ₄₅Allet jurddaš ahte mun sivahalan din Áhči ovddas. Din sivahallá Moses, son geasa dii lehpet bidjan iežadet doaivvu. ₄₆Jos dii livččiidet jáhkkán Mosesii, de dii livččiidet oskon munnje, dasgo son lea čállán mu birra. ₄₇Muhto jos dii ehpet oskko su čállagiidda, de mo dii dalle sáhttibehtet oskut mu sániide?”