Johannes 6

₁Das maŋŋil Jesus vulggii Galileajávrri dahjege Tiberiasjávrri nuppi beallái. ₂Ollu olbmot čuvvo su, danne go sii oidne mearkkaid maid son dagai go buoridii buhcciid. ₃Jesus manai várrái ja čohkánii dohko máhttájeddjiidisguin. ₄Beassážat, juvddálaččaid basit, ledje lahka. ₅Go Jesus geahčastii, de son oinnii ollu olbmuid boahtimin lusas. Son celkkii Filipii: “Gos mii sáhttit oastit láibbi, vai buot dát ožžot borrat?” ₆Dan son celkkii vai beassá geahččalit Filipa, dasgo son gal diđii maid áiggui dahkat. ₇Filip vástidii: “Ii guovttečuođi denáriige fidne dan mađe láibbi ahte juohkehažžii livččii bihtášge.” ₈Dalle nubbi máhttájeaddji, Simon Petera viellja Andreas, dajai sutnje: ₉“Dáppe lea mánná geas leat vihtta bivgeláibbi ja guokte guoli. Muhto mii dat lea ná ollugiidda?” ₁₀Jesus celkkii: “Gohččot olbmuid čohkánit.” Das lei rássás báiki, ja olbmot čohkánedje. Das ledje birrasii vihttaduhát olbmá. ₁₁Jesus válddii láibbiid, giittii Ipmila ja juogadii láibbiid daidda geat ledje čohkkámin das. Seammá ládje son juogadii guliid, ja buohkat ožžo nu ollu go dáhtto. ₁₂Go buohkat ledje gallánan, de Jesus celkkii máhttájeddjiidasas: “Čogget báhcán bihtáid, vai ii mihkkege fearranuša.” ₁₃Sii dahke nu, ja viđa bivgeláibbis čoggojedje vel guoktenuppelohkái veaddelihti dievva bihtát mat ledje báhcán go buohkat ledje geargan boradeames.

₁₄Go olbmot oidne mearkka maid Jesus dagai, de sii dadje: “Dát lea duođaid dat profehta gii galggai boahtit máilbmái.” ₁₅Jesus diđii ahte sii áigo boahtit ja veagal dahkat su gonagassan. Danne son vulggii sin luhtte ja manai várrái. Son manai dohko okto.

₁₆Go šattai eahket, de máhttájeaddjit manne vuolás jávregáddái, ₁₇lávkejedje fatnasii ja vulge Kapernauma guvlui nuppe beallái jávrri. De lei juo sevnnjodan, iige Jesus lean velá boahtán sin lusa. ₁₈Go garra biegga bossugođii, de jávri stuimmáskii. ₁₉Go sii ledje suhkan guoktelogivihtta dahje golbmalogi stadia, de sii oidne Jesusa vádjoleamen jávrri báruid alde ja lahkaneamen fatnasii. Sii ballagohte, ₂₀muhto Jesus celkkii sidjiide: “Mun dat lean, allet bala.” ₂₁Sii áigo váldit su fatnasii, muhto dallánaga fanas lei juo joavdan dan gáddái gosa sii ledje mannamin.

₂₂Maŋit beaivvi don bealde jávrri ledje ain ollu olbmot. Sii ledje oaidnán ahte das lei dušše okta fanas ja ahte Jesus ii lean mannan fatnasii máhttájeddjiidis mielde, muhto sii ledje vuolgán almmá su haga. ₂₃ Tiberiasis bohte goit fatnasat lahka dan báikki gos Hearrá lei giitán Ipmila ja biebman álbmoga. ₂₄Go olbmot dal oidne ahte Jesus ii lean das eaige su máhttájeaddjitge, de sii lávkejedje fatnasiidda ja vulge Kapernaumii ohcat Jesusa.

₂₅Sii gávdne Jesusa nuppi bealde jávrri ja jerre sus: “Rabbi, goas don leat deike boahtán?” ₂₆Jesus vástidii: “Duođaid, duođaid, mun cealkkán didjiide: Ehpet dii dan dihte mu oza go lehpet oaidnán mearkkaid, muhto dan dihte go boraidet láibbi ja galláneiddet. ₂₇Allet bargga dan borramuša dihte mii nohká, muhto dan borramuša dihte mii bistá ja addá agálaš eallima, dan maid Olbmobárdni addá didjiide. Dasgo Ipmil Áhčči lea merken su seaillainis.”

₂₈Sii dadje sutnje: “Maid mii galgat dahkat, vai min dagut livčče Ipmila dagut?” ₂₉Jesus vástidii: “Dát lea Ipmila dahku: Oskot sutnje gean Ipmil lea vuolggahan.” ₃₀Sii jerre: “Maid mearkkaid don dalle dagat, vai mii oaidnit ja oskut dutnje? Maid don dagat? ₃₁Min áhčit borre meahcis manna, nugo lea čállojuvvon: Son attii almmis sidjiide láibbi borrat.” ₃₂Jesus vástidii: “Duođaid, duođaid, mun cealkkán didjiide: Ii Moses addán almmis didjiide láibbi, muhto mu Áhčči addá didjiide duohta almmi láibbi. ₃₃Ipmila láibi lea dat mii boahtá almmis ja addá máilbmái eallima.” ₃₄Sii dadje: “Hearrá, atte midjiide álelassii dan láibbi.” ₃₅Jesus celkkii: “Mun lean eallima láibi. Gii boahtá mu lusa, dat ii goassege nealggo, ja gii osku munnje, dat ii goassege goikka. ₃₆Muhto dii, nugo mun lean dadjan didjiide, lehpet oaidnán mu ehpetge dattetge oskko. ₃₇Buohkat geaid Áhčči addá munnje, bohtet mu lusa, ja dan gii boahtá mu lusa, mun in eisege áje eret. ₃₈In mun leat boahtán almmis dahkat dan maid ieš dáhtun, muhto su dáhtu gii lea vuolggahan mu. ₃₉Ja su dáhttu gii mu lea vuolggahan, lea dat ahte mun in masse ovttage dain geaid son lea addán munnje, muhto čuoččáldahtán sin buohkaid maŋimuš beaivvi. ₄₀Mu Áhčči dáhttu ahte juohkehaš gii oaidná Bártni ja osku sutnje, oažžu agálaš eallima. Mun čuoččáldahtán su maŋimuš beaivvi.”

₄₁Juvddálaččat nimmoredje, danne go Jesus celkkii: “Mun lean dat láibi mii lea boahtán almmis.” ₄₂Sii dadje: “Almma dát lea Jesus, Josefa bárdni? Mii dovdat su áhči ja eatni. Mo son de sáhttá dadjat ahte lea boahtán almmis?” ₄₃Jesus celkkii sidjiide: “Allet nimmor! ₄₄Ii oktage sáhte boahtit mu lusa muđui go Áhčči guhte lea vuolggahan mu, geassá su. Dan gii boahtá, mun čuoččáldahtán maŋimuš beaivvi. ₄₅Profehtaid čállagiin daddjojuvvo: Sii buohkat šaddet Ipmila máhttájeaddjin. Juohkehaš gii lea guldalan Áhči ja oahppan sus, boahtá mu lusa. ₄₆Muhto ii oktage leat oaidnán Áhči; dušše son gii lea boahtán Ipmila luhtte, lea oaidnán Áhči. ₄₇Duođaid, duođaid, mun cealkkán didjiide: Das gii osku, lea agálaš eallin. ₄₈Mun lean eallima láibi. ₄₉Din áhčit borre meahcis manna, ja liikká sii jápme. ₅₀Muhto dát láibi boahtá almmis, ja gii borrá dán láibbi, dat ii jáme. ₅₁Mun lean dat ealli láibi mii lea boahtán almmis, ja gii borrá dán láibbi, dat eallá agálaččat. Láibi maid mun attán, lea mu oažži. Mun attán dan, vai máilbmi oažžu eallit.”

₅₂Dalle juvddálaččat riidališgohte gaskaneaset. Sii jerre guhtet guoimmisteaset: “Mo son sáhttá addit midjiide iežas oačči borrat?” ₅₃Jesus celkkii sidjiide: “Duođaid, duođaid, mun cealkkán didjiide: Jos dii ehpet bora Olbmobártni oačči ja juga su vara, de dis ii leat eallin. ₅₄Muhto das gii borrá mu oačči ja juhká mu vara, lea agálaš eallin, ja mun čuoččáldahtán su maŋimuš beaivvi. ₅₅Mu oažži lea duohta borramuš, ja mu varra lea duohta juhkamuš. ₅₆Dat gii borrá mu oačči ja juhká mu vara, bissu mu siste ja mun bisun su siste. ₅₇Áhčči guhte eallá, lea vuolggahan mu, ja nugo mun oaččun eallima sus, nu oažžu mus eallima dat gii mu borrá. ₅₈Dát lea dat láibi mii lea boahtán almmis. Dat lea earálágán go dat borramuš maid din áhčit borre. Sii jápme, muhto dat gii borrá dán láibbi, eallá agálaččat.” ₅₉Dán son celkkii go lei oahpaheamen olbmuid Kapernauma synagogas.

₆₀Go máhttájeaddjit dan gulle, de ollugat sis dadje: “Dát lea garra sárdni. Gii gillá dan gullat?” ₆₁Jesus diđii ahte su sániid dihte máhttájeaddjit nimmoredje, ja son celkkii: “Vearránahttágo dát din? ₆₂Naba jos dii oaidnibehtet Olbmobártni mannamin bajás dohko gos son lei ovdal! ₆₃Dušše vuoigŋa addá eallima, oažži ii ávkkut maidege. Dat sánit maid mun lean sárdnon didjiide, leat vuoigŋa ja eallin. ₆₄Muhto muhtumat dis eai oskko.” Dasgo Jesus diđii álggu rájes geat eai oskon ja gii beahttá su. ₆₅Ja son celkkii vel: “Aiddo danne mun celken didjiide ahte ii oktage sáhte boahtit mu lusa jos Áhčči ii atte dan sutnje.”

₆₆Das maŋŋil eatnagat Jesusa máhttájeddjiin heite vádjoleames su mielde. ₆₇Jesus jearai dan guoktenuppelohkásis: “Dáhttubehtetgo maiddái dii mannat eret?” ₆₈Simon Peter vástidii: “Hearrá, gean lusa mii galggašeimmet mannat? Dus leat agálaš eallima sánit. ₆₉Mii oskut ja diehtit ahte don leat Ipmila Bassi.” ₇₀Jesus celkkii sidjiide: “Almma mun ieš válljejin din guoktenuppelohkása? Ja liikká okta dis lea beargalat.” ₇₁Son oaivvildii Judasa, Simon Iskariota bártni. Son beahtášii Jesusa, vaikko lei okta dan guoktenuppelohkásis.