Johannes 7

₁Das maŋŋil Jesus vádjolii miehtá Galilea. Judeas son ii dáhtton vádjolit, danne go juvddálaččat bivde goddit su.

₂Juvddálaččaid lastagoahtebasit ledje lahka. ₃Jesusa vieljat dadje sutnje: “Vuolgge Judeai, vai maiddái du máhttájeaddjit oidnet makkár daguid don dagat. ₄Ii oktage daga maidege čihkosis, jos dáhttu leat beakkálmas. Jos don dagat dákkár daguid, de čájet máilbmái gii don leat!” ₅Eai su vieljatge oainnat oskon sutnje. ₆Jesus celkkii sidjiide: “Mu áigi ii leat velá boahtán, muhto didjiide áigi lea álo vuogas. ₇Máilbmi ii sáhte vašuhit din, muhto mu dat vašuha, dainna go mun duođaštan ahte dan dagut leat bahát. ₈Mannet dii dáidda basiide. Mun in vuolgge, dasgo mu áigi ii leat velá boahtán.” ₉Nu son celkkii ja bázii ieš Galileai.

₁₀Muhto go su vieljat ledje vuolgán basiide, de maiddái Jesus vulggii dohko, ii albmosit muhto čihkosis. ₁₁Basiid áigge juvddálaččat ohce su ja jerre: “Gos dat olmmái lea?” ₁₂Álbmoga gaskkas lei ollu digašteapmi su birra. Muhtumat dadje: “Son lea buorre olmmái,” earrásatgis dadje: “Ii leat, son fille olbmuid.” ₁₃Ii dattetge oktage duostan sárdnut albmosit su birra, danne go buohkat balle juvddálaččain.

₁₄Go lei juo basiid guovddáš, de Jesus manai bajás tempelii ja oahpahišgođii. ₁₅Juvddálaččat ovddošedje ja dadje: “Mo dát oahppameahttun olmmái sáhttá dovdat čállagiid?” ₁₆Jesus celkkii sidjiide: “Dat maid mun oahpahan, ii leat mu oahppa, muhto su gii lea mu vuolggahan. ₁₇Gii dáhttu dahkat su dáhtu, dat šaddá diehtit boahtágo mu oahppa Ipmilis vai sártnungo mun iešalddán. ₁₈Dat gii sárdnu iežas jurdagiid, bivdá iežas gudni. Muhto dat gii bivdá su gudni gii lea su vuolggahan, sárdnu duođa, iige sus leat mihkkege vearrivuođaid. ₁₉Almma Moses attii didjiide lága? Dattetge ii oktage dis doala lága. Manne dii bivdibehtet mu goddit?”

₂₀Olbmot dadje: “Dus lea bahás vuoigŋa. Gii bivdá du goddit?” ₂₁Jesus vástidii: “Ovtta dagu mun dahken, ja dan dii buohkat ovddošehpet. ₂₂Moses attii didjiide birračuohpahusa – dat ii gal boađe Mosesis, muhto áhčiin – ja dii birračuohppabehtet maiddái sabbahin. ₂₃Jos olmmoš sáhttá birračuhppojuvvot maiddái sabbahin vai Mosesa láhka ii rihkkojuvvo, manne dii dalle lehpet munnje moaris danin go mun sabbahin dahken dearvvašin oppa olbmo? ₂₄Allet dubme hámi mielde, muhto dubmejehket vuoigatlaččat.”

₂₅Muhtun Jerusalema olbmot dadje: “Almma son lea dat gean juvddálaččat bivdet goddit? ₂₆Mo son oažžu sárdnut dáppe albmosit, eaige sii daja sutnje maidege? Leatgoson ráđđeolbmát dál dovddiidan ahte son lea Messias? ₂₇Mii gal diehtit guđe báikki olmmoš dát olmmái lea, muhto go Messias boahtá, de ii oktage dieđe gos son boahtá.”

₂₈Go Jesus lei oahpaheamen tempelis, de son čuorvvui: “Dii gal dovdabehtet mu ja diehtibehtet gos mun boađán. Mun in leat boahtán iežan dáhtus; mu vuolggahii son gii lea duohtavuohta. Dii ehpet dovdda su, ₂₉muhto mun dovddan su, danin go mun boađán su luhtte ja danin go son lea mu vuolggahan.” ₃₀Ráđđeolbmát dáhtto váldit su gitta, muhto ii oktage lokten gieđa su vuostá, danin go su áigi ii lean velá boahtán.

₃₁Eatnagat álbmogis osko sutnje ja dadje: “Go Messias boahtá, de illá son dahká eambbo mearkkaid go maid dát olmmái lea dahkan.” ₃₂Go farisealaččat gulle olbmuid ságasteamen ná Jesusa birra, de sii ja bajimusbáhpat vuolggahedje bálvváid váldit su gitta. ₃₃Jesus celkkii: “Oanehis áiggi mun lean velá din luhtte. De mun manan su lusa gii lea mu vuolggahan. ₃₄Dalle dii ohcabehtet mu, muhto ehpet gávnna. Dohko gos mun lean, dii ehpet beasa.” ₃₅Juvddálaččat árvaledje guhtet guimmiineaset: “Gosa son áigu mannat gos mii eat sáhte gávdnat su? Áigugo son mannat daid lusa geat ásset bieđgguid greikalaččaid gaskkas? Áigugo son oahpahit maiddái greikalaččaid? ₃₆Maid son oaivvilda go cealká: ‘Dii ohcabehtet mu, muhto ehpet gávnna’, ja: ‘Dohko gos mun lean, dii ehpet beasa’?”

₃₇Basiid maŋimuš ja stuorimus beaivvi Jesus čuoččastii sárdnut ja čuorvvui: “Jus guhtege goiká, son bohtos mu lusa ja juhkos! ₃₈Gii osku munnje, su siskkildasas golget ealli čázi jogat, nugo čállagiin daddjojuvvo.” ₃₉Dán son sártnui Vuoiŋŋa birra, gean sii ožžo geat osko sutnje. Dasgo Vuoigŋa ii lean velá boahtán, danne go Jesus ii lean velá hearvásmahttojuvvon.

₄₀De dadje eatnagat olbmuin geat gulle su sániid: “Dát ferte leat dat profehta.” ₄₁Earrásatgis dadje: “Son lea Messias!” Muhtumat gal eahpidedje: “Boahtába Messias dalle Galileas? ₄₂Almma čála cealká ahte Messias lea Davida nális ja boahtá Betlehemis, Davida ruovttugávpogis?” ₄₃Nu šattai dalle olbmuid gaskii gižžu su geažil. ₄₄Muhtumat dáhtto dohppet su, muhto ii oktage lokten gieđa su vuostá.

₄₅Bálvvát máhcce bajimusbáhpaid ja farisealaččaid lusa geat jerre: “Manne dii ehpet buktán su?” ₄₆Bálvvát vástidedje: “Ii goassege olmmoš leat sárdnon nu mo son.” ₄₇Dalle farisealaččat dadje: “Lehpetgo diinai fillehallan? ₄₈Leago oktage ráđđeolbmáin dahje oktage farisealaččain oskon sutnje? ₄₉Muhto dát álbmot mii ii dovdda lága, lea garuhuvvon.” ₅₀Nikodemus gii ieš lei ráđi lahttu ja ovdal lei mannan Jesusa luhtte, dajai: ₅₁“Almma min láhka ii dubme olbmo ovdal go son lea gažaduvvon ja lea gávnnahuvvon maid son lea dahkan.” ₅₂Dalle earát dadje sutnje: “Don dáiddát maid leat galilealaš. Guorahala čállagiid, de oahpat ahte Galileas ii boađe profehta.”

₅₃Buohkat vulge ruoktot, juohkehaš báikásis,