Job 15

₂Vástidivččiigo viissis

duššiid sárdnumiin,

deavddášiigo son geahppáidis

nuortabiekkain?

₃Válddášiigo son iežas bealuštussan

ávkkehis sárdnuma,

ságaid main ii leat gávdni masage?

₄Don dagat duššin ipmilbalu,

don billistat duođalašvuođa

Ipmila muođuid ovddas.

₅Du suddu coggá

sániid du njálbmái,

don leat válljen alccesat gávviliid giela.

₆Du iežat njálbmi dubme du, in mun,

du iežat baksamat duođaštit du vuostá.

₇Riegáditgo don vuosttamužžan

buot olbmuin,

šaddetgo don ovdal go várit?

₈Ledjetgo don guldaleamen

go Ipmil doalai ráđđádallamiid,

doppego don rábidit alccesat

buot viisodaga?

₉Dieđátgo don juoidá maid

mii eat dieđe,

ipmirdatgo juoidá maid mii eat ipmir?

₁₀Min gaskkasge leat vuorrasat

ja čurgesvuovttagat,

boarráseappot go du áhčči.

₁₁Leago dutnje ilá uhccán Ipmila jeđđehus,

sátni mii sárdnojuvvui dutnje láđđásit?

₁₂Manne don leat nu viimmáskan,

manne russot du čalmmit?

₁₃Manne don jorgalat moarát

Ipmila vuostá,

manne válddát njálbmái garra sániid?

₁₄Mo olmmoš sáhttá

leat buhtis? Sáhttágo oktage

gii lea riegádan nissonis

leat vuoigadis Ipmila vuostá?

₁₅Iihan Ipmil luohte oppa basiidasasge,

ii albmige leat buhtis su čalmmiin!

₁₆Mo dasto gealbbohis

ja billašuvvan olmmoš

gii juhká vearrivuođa nugo čázi?

₁₇Mun sártnun dutnje, guldal mu!

Mun dieđihan dutnje maid ieš lean oaidnán,

₁₈maid lean oahppan viissis olbmáin.

Sii eai čiehkan áhčiideaset dieđu.

₁₉Aivve sidjiide eanan addojuvvui,

amas olbmot eai ássan sin gaskkas.

₂₀Ipmilmeahttun eallá balus

buot beivviidis,

veahkaválddálaš ballá buot jagiid

mat sutnje leat udnojuvvon.

₂₁Son gullá čađat hirpmus jienaid,

ja go son atná iežas oadjebassan,

de rievvár boahtá.

₂₂Sus ii leat doaivu vealtat seavdnjadasas,

son lea mearriduvvon gahččat miehkkái.

₂₃Son čádjádallá go ohcá biepmu,

muhto ii son gávnna.

Son diehtá ahte seavdnjatvuođa beaivi

vuordá su.

₂₄Heahti ja áŧestus balddiha su,

dat falleha su dego soahtalas gonagas.

₂₅Son bajidii gieđa Ipmila vuostá!

Son goarggastattai Buotveagalačča vuostá,

₂₆fallehii su ceakkoniskkiid

assás gávdegalbbas suojis.

₂₇Su muođut duorššagedje,

son buoidudii alimiiddis.

₂₈Son ásai billašuvvan gávpogiidda,

viesuide main ii oktage ožžon ássat,

mat ledje mearriduvvon

šaddat čievračopman.

₂₉Son ii šatta rikkisin,

su opmodat ii biso,

su gordneoaivvit eai soja eatnamii.

₃₀Son ii vealtta seavdnjadasas.

Son lea vesá maid dolla boaldá,

ja biegga doalvu su liđiid.

₃₁Allos son dorvvastehko duššálašvuhtii!

Dalle son beahttá ieš iežas,

ja duššálašvuohta šaddá su bálkán.

₃₂Son goldná ovdal áiggi,

su oavssit eai runit goassege.

₃₃Son lea dego viidnemuorra

mii gahčaha láttakeahtes murjjiidis,

nugo oliivamuorra mii láhppá liđiidis.

₃₄Šattoheapme lea

ipmilmeahttumiid joavku,

dolla boaldá daid gođiid

geat váldet duolgguid.

₃₅Sii sahkanahttet lihkuhisvuođa

ja riegádahttet bahávuođa,

sin goaŧus šaddá dušše beahtus.