Job 16

₂Mun lean gullan doarvái diekkáriid,

návccahis jeđđejeaddjit dii lehpet buohkat.

₃Leatgo geargan sárdnumis duššiid?

Vai leago dus ain sárdnumuš?

₄Mun maid sáhtášin sárdnut nugo dii.

Jos dii mu sajis,

de mun sáhtášin doallat guhkes sártniid

ja bárdit didjiide oaivvi.

₅Mun roahkasmahtášin din čáppa sániiguin,

jeđđešin din iežan baksamiid ságaiguin.

₆Jos mun sártnun, de mu bávččas ii lotkkot.

Jos orun jávohaga, de jávkágo dat dainna?

₇Ipmil, don leat vuoimmehuhttán mu,

don leat duššadan mu olbmuid.

₈Don dohppejit mu gitta,

mu ruoinnasvuohta čuožžilii

duođaštit mu vuostá,

dat sivahallá mu.

₉Moaris dat gaikkoda mu ja gáskkaša mu,

dat gižaha munnje bániid.

Mu vašálaččat ráiget mu

bastilis geahčastagaiguin.

₁₀Sii cagget munnje njálmmi,

sii hiddjidit mu ja doaškalit mu nirrii,

fallehit mu oktanaga.

₁₁Ipmil lea addán mu

bahás olbmuid háldui,

son lea hoigadan mu

ipmilmeahttumiid gihtii.

₁₂Go mun ellen ráfis,

de dalle son šluvgilii mu,

dohppii mu niskái ja cuvkii mu,

bijai mu njuolaidis moallan.

₁₃Su njuolat deive mu rupmašii,

árpmuheamit son ráiggai

mu monimuččaid

ja golggahii mu sáhpi eatnamii.

₁₄Son časkkii sárjji sárjji badjelii,

son fallehii mu dego soahteolmmái.

₁₅Mun lean gorron seahka

iežan rupmaša govččasin,

vuoimmeheapmin mun veallán muolddas.

₁₆Gatnjalat boldet mu ámadadju,

mu čalmmit sevnnjodit.

₁₇Dattetge mu gieđain ii leat veahkaváldi,

ja mu rohkadus lea buhtis.

₁₈Eanan, ale govčča mu vara,

ale divtte mu čuorvasa goassege jaskkodit!

₁₉Mus lea duođašteaddji almmis,

son lea mu bealušteaddji allagasas.

₂₀Mu ustibat bilkidit mu,

čieru mun jorgalan Ipmila guvlui.

₂₁Vare son bealuštivččii olbmo

Ipmila ovddas,

nugo olmmoš bealušta nuppi.

₂₂Mu oanehis eallin lea fargga meattá.

Mun vádjolan dan geainnu

man mielde in šat máhca.