Job 21

₂Guldalehket juo maid mun dajan,

udnojehket munnje dan jeđđehusa!

₃Girdet mu go mun sártnun,

ja go lean geargan,

de oažžubehtet bilkidit.

₄Olbmuidgo mun lean váidaleamen?

Almma mus lea sivva leat gierdameahttun!

₅Gehččet munnje, de soaigibehtet

ja bidjabehtet gieđa njálmmi ovdii.

₆Mun suorganan go smiehtan dán,

mu rumaš doarggista.

₇Manne ipmilmeahttumat

besset eallit boarisin

ja velá ovdánit buori dillái?

₈Sin mánát ellet oadjebassan sin luhtte,

mánáidmánát leat sin čalmmiid illu.

₉Sin viesuin ii leat mihkkege mas ballat,

Ipmila spižát eai deaivva sidjiide.

₁₀Sin vuovssát čoavjudit eaige stajit,

sin gusat guddet eaige reito.

₁₁Mánáideaset sii luitet olggos

dego sávzzaid,

sin bártnážat njuikkodit sin birra,

₁₂lávlot ja čuojahit rumbbu ja lyra,

ávvudallet go njurgganasat čudjet.

₁₃Sin beaivvit leat lihkolaš beaivvit,

ja ráfálaččat sii mannet jábmiidáibmui.

₁₄Dattetge sii dadjet Ipmilii:

“Divtte min orrut!

Mii eat beroš dovdat du geainnuid.

₁₅Gii lea Buotveagalaš,

manne mii galggašeimmet bálvalit su?

Maid min ávkkuha rohkadallat su?”

₁₆Sii váldet lihku iežaset gihtii,

sii mearridit áigumušaideaset ieža

eaige váldde vuhtii Ipmila.

₁₇Man dávjá čáská

ipmilmeahttumiid lámpá?

Goas lihkuhisvuohta deaivida sin,

goas sii ožžot oasiset

Ipmila moari časkkástagain?

₁₈Vare sii šattašedje oalggaid láhkái

biekka ovddas

nugo sáđut maid riđđu njávkkasta eret?

₁₉ Vurkego Ipmil lihkuhisvuođa

ipmilmeahttuma mánáide?

Ii fal nu!

Mávssahehkos Ipmil sutnje alccesis,

gillájehkos son ieš iežas ráŋggáštusa!

₂₀Muosáhehkos son iežas heavvaneami,

juhkos son Buotveagalačča moari geara!

₂₁Maid son šat fuollá iežas mánáin,

go su mánuid lohku lea dievvan?

₂₂Áigugo olmmoš oahpahit viissisvuođa

Ipmilii, stuorráid duopmárii?

₂₃Muhtin jápmá

gaskan buoremus searaidis,

oadjebassan ja ráfálaččat.

₂₄Su rumaš lea máihlái, su dávttit ađđát.

₂₅Nubbi jápmá bahča morrašis,

iige son goassege leat beassan

návddašit eallima buorrevuođa.

₂₆Goappašagat biddjojuvvoba muldii,

ja máđut gokčet sudno.

₂₇Gal mun dieđán maid dii jurddašehpet,

makkár juonaiguin dii áigubehtet giellat mu!

₂₈Diihan dadjabehtet:

“Gos dál lea oaivámučča visti,

gos suttolaččaid goađit?”

₂₉Jerret mat dakkáriin geat johtet viidát,

váldet vuhtii maid sii muitalit:

₃₀Bahás olmmoš sestojuvvo

lihkuhisvuođa beaivvi,

son dolvojuvvo suodjái

go moari beaivi boahtá.

₃₁Gii cuiggoda sutnje čalbmehálgui

su heajos eallima,

gii mávssaha sutnje

dan maid son lea dahkan?

₃₂Ja go son guddojuvvo hávdái,

de olbmot gohcet su hávdečoma guoras,

₃₃ja njálggat lea su vuoiŋŋadus

leagi muoldda siste.

Su maŋŋil mannet buot olbmot,

ja dat geat manne su ovdal,

leat lohkameahttumat.

₃₄Din jeđđehus lea duššálaš,

din vástádusain lea aivve behtolašvuohta.