Job 22

₂Sáhttágo olmmoš leat ávkin Ipmilii,

máhttágo velá jierpmáleamosge

leat sutnje ávkin?

₃Leago du vanhurskkisvuohta

illun Buotveagalažžii,

dahje vuoitun dat

ahte vádjolat láitemeahttumit?

₄Ráŋggáštago son du

du ipmilbalolašvuođa dihte,

mannágo son duinna dan dihte

rievtti ovdii?

₅Almma du bahávuohta lea stuoris

ja du vearredagut loahppameahttumat?

₆Almmá siva haga don

váldet pántta vieljainat

ja rievidit sis velá sin maŋimuš biktasiidge.

₇It don addán váiban olbmui čázi juhkat,

nealgeolbmos don biehttalit láibbi.

₈Eananhan gulai fámolaš olbmái,

das ásai stuorra hearrá!

₉Leaskkaid don vuolggahit eret

guoros gieđaid,

cuvkejit áhčihemiid dorvvu.

₁₀Oavdu dál du birra leat gielat,

ja fáhkkes ballu suorggaha du.

₁₁Itgo don oainne seavdnjadasa

itge čáhcedulvvi mii heavaha du?

₁₂Almma Ipmil lea allat dego albmi?

Geahča bajimuš násttiid,

man allagasas dat leat!

₁₃Dattetge don jearat:

“Diehtágo Ipmil maidege?

Oaidnágo son dubmet seavdnjadasa čađa?

₁₄Balvvat gokčet su,

iige son oainne maidege.

Son vádjola gáidagasas

almmi gomuvuođa alde.”

₁₅Almma don čuovut dan boares bálgá

man mielde bahás olbmot vádjolit.

₁₆Dat geat rohttejuvvojit eret

ovdal áiggi,

go dulvi doidá eret sin vuođu.

₁₇Sii dadje Ipmilii: “Divtte min orrut!

Maid Buotveagalaš sáhttá dahkat midjiide?”

₁₈Son lei goitge deavdán

sin viesuid buriiguin!

Muhto sii mearridedje áigumušaideaset

eaige váldán Ipmila vuhtii.

₁₉Vuoigatlaččat oidnet mo

sidjiide geavvá ja illudit,

sivaheamit bilkidit sin:

₂₀“Gehččet mo min vuostálastit

duššaduvvojit,

ja dolla loaktá dan mii vel lea báhcán.”

₂₁Soabat dal suinna, Job,

de dutnje geavvá bures,

ja lihkku máhccá fas du lusa.

₂₂Gula su, go son oahpaha du,

ja vurke su sániid váibmosat.

₂₃Jos don jorgalat Buotveagalačča beallái,

de don oaččut fas dan maid leat massán.

Jos don gáidadat vearrivuođa goađistat

₂₄ja bálkestat golliidat muldii,

iežat Ofira golliid joga geđggiid gaskii,

₂₅de Buotveagalaš šaddá du gollin

ja du silbbaid eatnatvuohtan.

₂₆Dalle Buotveagalaš lea du illu,

ja don oaččut bajidit muođuid Ipmila guvlui.

₂₇Go don rohkadalat su, de son gullá du,

ja don oaččut ollašuhttit dan

maid leat lohpidan.

₂₈Jos don mearridat dahkat juoidá,

de dat lihkostuvvá dutnje,

ja beaivi báitá du geainnuide.

₂₉Ipmil vuolida daid geat čeavlástallet,

muhto vuollegaččaid son beastá.

₃₀Son gádju velá dange

gii ii leat vigiheapme;

jos sus leat buhtis gieđat,

de son gáddjojuvvo.