Job 23

₂Vel oktii mun váidalan bahččagit.

Su giehta lea lossat, ja mun šuohkán.

₃Vare mun dieđášin gos su sáhttá gávdnat!

Mun manašin su duopmostuolu ovdii,

₄ovddidivččen áššán sutnje

ja buvttášin ovdan iežan ákkaid.

₅Mun beasašin gullat maid son vástida,

oččošin diehtit maid son dáhttu

sárdnut munnje.

₆Livččiigo son munnje goavvi?

Ii eisege, son baicce guldalivččii mu.

₇Das digaštalašii suinna

vuoigatlaš olmmái,

ja mun celkojuvvošin sivaheapmin

agálaččat.

₈Muhto jos mun manan nuorttas,

de ii son leat doppe,

jos jorggihan oarjjás,

de in mun áicca su.

₉Jos mun ozan davvin,

de in mun oainne su,

jos jorggihan lulás,

de in mun gávnna su.

₁₀Son dovdá geainnu

man mun vádjolan,

ja jos son geahččala mu,

de mun lean buhtis dego golli.

₁₁Mun lean vádjolan oskkáldasat

su luottaid,

mun lean váldán vuhtii su geainnu

inge leat spiehkastan das.

₁₂Mun in leat rihkkon báhkkomiid

maid son lea addán,

mun lean vurken su sániid

iežan siskkildassii.

₁₃Go son lea mearridan juoidá,

gii dalle sáhttá hehttet su?

Maid son dáhttu, dan son dahká.

₁₄Son ollašuhttá

dan maid lea mearridan mu várás

– ollu dakkáraččat leat vuordimis.

₁₅Danne mun balan go oainnán su,

go mun jurddašan su, de mun doarggistan.

₁₆Ipmil lea dahkan mu váimmu árgin,

Buotveagalaš lea mu balddihan.

₁₇Muhto seavdnjadas ii jávohuhte mu,

mun in jávohuva su ovddas

gean seavdnjadas gokčá.