Job 24

₁Manin dušše Buotveagalaš diehtá

duomu áiggiid,

manne dat leat suollemasat

daidda geat dovdet su?

₂Ipmilmeahttumat sirdet rádjegeđggiid,

rievidit ealuid ja dolvot daid guohtut.

₃Sii dolvot oarbása ásena,

sii váldet pántan leaskka vuovssá.

₄Sii hoigadit váivvášiid luottas,

ja eatnama lojes olbmot fertejit čiehkádit.

₅Dego meahcceásenat

sii johtet ávdin guovlluin.

Sii mannet meahccái,

doppe sii rahčet ja ohcet maid borrat,

biepmu mánáidasaset.

₆Sii čogget gordneoivviid

skealmmaid bealdduin

ja boibmot dan mii lea báhcán

ipmilmeahttuma viidnegárdái.

₇Álásin, almmá biktasiid haga,

sii idjadit olgun,

almmá gokčasa haga galbmasis.

₈Váriid ráššoarvi njuoskada sin,

sii náđđot bávtti állái vai ožžot suoji.

₉Oarbbes mánná rohttejuvvo

eret eatnis čiččis,

váivváša njuoratmánná váldojuvvo pántan.

₁₀Sii vázzet álásin, almmá biktasiid haga,

nealggis sii fertejit guoddit gordnegihpuid.

₁₁Muvrraid gaskkas sii vuožuhit oljju,

dulbmet viidnebohčingári ja goiket.

₁₂Gávpogis gullo jámadeddjiid luoibman,

hávvádahtton olbmot bárgot heađis.

Dattetge Ipmil ii gula sin rohkadusa.

₁₃Muhtumat leat čuovgasa vašálaččat.

Eai sii dovdda čuovgasa geainnuid,

eai sii vádjol dan bálgáid.

₁₄Go lea sevnnjodan,

de sorbmejeaddji čuožžila

ja časká jámas váivváša ja vártnuheami.

Ihkku son johtá suollaga láhkái.

₁₅Fuorás olmmái vuordá eahkedisveaiggi.

Son jurddaša: “Ii oktage oaččo oaidnit mu,”

ja gokčá ámadajus.

₁₆Seavdnjadin sii gaikot viesuide,

beaivet sii leat čihkosis.

Eai sii dáhto oaidnit čuovgga.

₁₇Sidjiide buohkaide

seavdnjadas lea dego iđit,

siihan dovdet

buot seavdnjadasa balddáhusaid.

₁₈Sii jávket dego bárožat čáhcegierragis.

Sin árbeoassi eatnamis lea garuhuvvon,

ii oktage mana sin viidnegárddiide.

₁₉Goikkádat ja báhkka

njielasta muohtačázi,

jábmiidáibmu dan gii lea suddudan.

₂₀Su iežas eadni vajáldahttá su,

su borret máđut.

Ii oktage šat muitte su,

ja bahávuohta doddjojuvvo dego muorra.

₂₁Son speajai mánáhis nissona,

leaskka son ii veahkehan.

₂₂Fámuinis Ipmil rohtte eret

veagalaččaidge.

Go son čuožžila,

de buohkat balahit heakkaset.

₂₃Son diktá sin dovdat iežaset

oadjebassan ja dorvvolažžan,

muhto su čalmmit gozihit sin vádjolusa.

₂₄Sii čevllohallet muhtun áiggi,

muhto de sii leat jávkan.

Sii sojahuvvojit ja veallánit nugo skáhčirat,

sii čuhppojuvvojit dego gordneoaivvit.

₂₅Duođaid, nu dat lea.

Gii dahká mu gielisin ja mu sániid duššin?