Job 25
Bildad sárdnu goalmmát háve
1De šuahlaš Bildad fas sárdnugođii. Son dajai:
2Son gii almmi allatvuođas bisuha ráfi,
son dagaha balu, sutnje gullá váldi.
3Su veagat leat lohkameahttumat,
su čuovga ollá buohkaide.
4Sáhttágo olmmoš leat vuoigadis
Ipmila vuostá,
sáhttágo dat gean nisson lea riegádahttán,
leat buhtis?
5Velá mánnuge ii leat šealgat,
eai násttitge buhttásat su čalmmiin.
6Mo dalle olmmoš, duot máhtu,
olbmománná, duot suoksa!
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
