Job 26

₂Gal juo leat bures veahkehan

fámohis olbmá,

doarjalan gieđainat vuoimmeheami!

₃Gal juo leat nevvon diehtemeahttuma,

oahpahan sutnje valljugasat viissisvuođa!

₄Gii attii dutnje dáid sániid,

gean vuoigŋa sárdnu du njálmmis?

₅Jámežat doarggistit,

čáziid čiekŋalas ja dat mat doppe ásset.

₆Rahppojuvvon lea jábmiidáibmu

Ipmila ovdii,

čiekŋalas lea almmá gokčasa haga.

₇Son lea lebben almmi ávdima badjel,

son lea heaŋggastan eatnama dušši vehkii.

₈Son giessá čáziid balvvaidis sisa,

eaige balvvat gaikán daid deattus.

₉Son čiehká iežas truvnnu,

son lebbe balvvaidis dan birra.

₁₀Son lea sáhcon áhpái rádján

almmiravdda,

dohko gos čuovggas ja seavdnjadas

deaivvadit.

₁₁Almmi báccit doarggistit,

dat suorganit go son čeargu.

₁₂Son lea stuimmáskahttán ábi

fámuinis,

son lea cuvken Rahaba viissisvuođainis.

₁₃Son bosui biekkainis

almmi jalahassan,

su giehta čuggii čađa fales gearbmaša.

₁₄Muhto dát lea dušše

olggumus ravda su barggus,

dat maid mii leat gullan,

lea dušše savkkas.

Gii dalle ipmirda

su buotveagalašvuođa bajána?