Job 33

guldal dárkilit mu sániid!

₂Dál mun rabastan njálmmi,

divttán iežan jiena gullot.

₃Mun sártnun dieđu sániid

duohta váimmus,

mu baksamat addet čielga dieđu.

₄Ipmila vuoigŋa lea sivdnidan mu,

Buotveagalačča vuoiŋŋahat

addá munnje eallima.

₅Vástit munnje, jos máhtát,

ráhkkan nágget muinna!

₆Ipmila ovddas mun lean du dássásaš,

moai letne dahkkojuvvon ovttat láirris.

₇Don it dárbbaš ballat mus,

mun in ane dutnje garra miela.

₈Don celket mu gullut,

mun gullen ieš go don dadjet:

₉“Mun lean vigiheapme,

in leat dahkan vearrivuođa,

mun lean buhtis, in leat suddudan.

₁₀Muhto son ohcá mu vuostá ášši,

son atná mu vašálažžanis.

₁₁Son bidjá mu julggiid láhkkiide,

son goziha buot mu geainnuid.”

₁₂Dies don it leat vuoigadis!

Mun dajan dutnje:

Ipmil lea stuorit go olmmoš.

₁₃Manne don sivahalat su das

ahte son ii vástit olbmui?

₁₄Ipmil sárdnu ovtta láhkái,

velá guovtti láhkái,

muhto olbmot eai fuobmá dan.

₁₅Niegus, idjaoainnáhusas

go losses nahkárat leat rohtten olbmo

ja son oađđá sajistis,

₁₆dalle Ipmil rahpá su bealji

ja cuiggoda su,

₁₇vai son heaitá bahás daguid

ja gáidada čeavlli,

₁₈danin go Ipmil dáhttu

gádjut su hávddis

ja mannamis jábmiidáibmui.

₁₉Dahje go bákčasat bagadit olbmo

su oađđinsajis,

oktilaš gibut su rupmašis,

₂₀borramuš gákkaha su váimmu

eaige sutnje njálggit oppa herskkotge.

₂₁Su rumaš sotná jur oaidnemeahttumin,

ja buot su dávttit leat oaidnimis liikki čađa.

₂₂Son lea mannamin hávddi guvlui,

jápmima fámut leat vuordimin su.

₂₃Jos dalle su luhtte lea eŋgel,

okta áirras duháhis,

gii gulaha su vanhurskkisin,

₂₄de Ipmil lea árpmihan su ja cealkán:

“Gájo su mannamis hávdái,

lonis lea máksojuvvon.”

₂₅Su rumaš šaddá lášmadin

dego dalle go son lei nuorra,

son oažžu fas iežas nuorravuođa vuimmiid.

₂₆Go son rohkadallá, de Ipmil gullá su,

ávuin son beassá geahččat Ipmila muođuid.

Nu Ipmil čuoččáldahttá fas olbmo.

₂₇Ávuin olmmoš sárdnu buohkaide:

“Mun suddudin ja botnjen vuoigatvuođa,

muhto dattetge son ii ráŋggáštan mu.

₂₈Son gájui mu mannamis hávdái,

ja mun beasan eallit ja oaidnit čuovgga.”

₂₉Buot dán Ipmil dahká olbmui

guovtte geardde,

velá golmma gearddege,

₃₀son buktá su fas hávddis

ja diktá eallima čuovgga báitit su birra.

₃₁Gula, Job, guldal mu,

oro jaska, dál sártnun mun.

₃₂Jos dus lea dadjamuš, de daja,

mun sávašin ahte don leat vuoigadis!

₃₃Muhto jos dus ii leat dadjamuš,

de guldal mu,

oro jávohaga, de mun

oahpahan dutnje viisodaga.