Elihu sárdnugoahtá
1Dot golmmas heite dál sárdnumis Jobiin, danne go Job anii iežas sivaheapmin. 2Muhto de moaráhuvai Elihu. Elihu, Barakela bárdni, gulai Rama sohkii ja lei Busas eret. Son moaráhuvai Jobii gii oaivvildii ahte son lei vuoigadis Ipmila vuostá. 3Son moaráhuvai maiddái Joba ustibiidda, danne go sii eai sáhttán vástidit Jobii, vaikko atne su sivalažžan. 4Elihu lei vuordán dan botta go dot sárdno Jobiin, danne go sii ledje boarráseappot go son. 5Muhto go son oinnii ahte dat golmmas sánehuvve, de su moarri cahkiidii.
6Dál buslaš Elihu, Barakela bárdni, sárdnugođii. Son dajai:
Mun lean nuorra, ja dii lehpet vuorrasat.
Danne mun doalahadden sárdnumis
inge arvan muitalit maid dieđán.
7Mun jurddašin: Sárdnos ahki,
oahpahehkos jagiid eatnatvuohta
viissisvuođa.
8Muhto vuoigŋahan dahká
olbmo viissisin,
Buotveagalačča vuoiŋŋahat
addá ipmárdusa.
9Eai dušše boarrásepmosat leat viisát,
eai vuorrasatge álo dieđe mii lea riekta.
10Dan dihte mun dajan: Guldalehket mu,
dál mun muitalan maid dieđán.
11Mun vurden dan botta go dii sártnuidet
ja dárkojin jierpmálaš sániid,
daid ákkaid maid dii buvttášeiddet ovdan.
12Mun guldalin din dárkilit,
muhto ii oktage dis bihtán Jobis,
ii oktage máhttán nuktalit su.
13Allet daja: “Mii leat oaidnán ahte
dušše Ipmil sáhttá jávohuhttit su,
ii olmmoš.”
14Son ii sárdnon munnje,
inge mun áiggo vástidit sutnje nugo dii.
15Dat olbmát leat sánehuvvan
eaige šat vástit,
sii leat nohkkon sániin.
16Galggašingo mun vel vuordit
ahte sii sárdnot,
dál go sii čužžot dás eaige máhte vástidit?
17Dál áiggun mun sárdnut,
munge áiggun muitalit maid dieđán.
18Mus lea ollu sárdnumuš,
mu siste beanta duoldá,
19mun lean dego ruhkku
man dievva lea ođđa viidni,
nugo viidneseahkka
mii lea gaikáneamen.
20Mun ferten sárdnut vai beasan vuoigŋat,
mun rabastan njálmmi ja vástidan.
21Mun in geahča guđege olbmo hápmái,
mun in njálggis ovttainge,
22in oppa máhtege njálggistit.
Jos riemašin dakkáriidda,
de mu sivdnideaddji rohttešii mu
fargga eret.
