Job 31

iežan čalmmiiguin:

In goassege geahča nieidda.

₂Mii livččii muđui mu oassi

almmi Ipmilis,

mu árbi Buotveagalaččas

guhte lea allagasas?

₃Lihkuhisvuohtahan deaivida

vearredahkki,

bahás oassi dan gii dahká baháid.

₄Almma Ipmil oaidná mu geainnuid,

almma son lohká buot mu lávkkiid?

₅Leango mun vádjolan behtolaččat,

leango leamaš gearggus beahttit?

₆Vihkkejehkos Ipmil mu

rievttes veavttain,

dalle son oaidná

ahte mun lean láitemeahttun.

₇Jos mu lávkkit leat spiehkastan bálgás,

jos mu čalmmit leat čádjidahttán

iežan váimmu,

jos suddu lea duolvvidan mu gieđaid,

₈de borros nubbi dan maid

mun lean gilván,

rohttejuvvojehkoset mu šattut eatnamis

oktan ruohttasiiguin!

₉Jos mun lean fillehallan

lagamužžan áhkkái,

jos lean njágadan su uvssa guoras,

₁₀de málejehkos mu áhkká

eará olbmá gortniid,

veallájehkos suinna gii ihkinassii.

₁₁Dat livččii fasttes dahku,

dakkár vearrivuohta

fertešii ráŋggáštuvvot.

₁₂Dat livččii dolla mii boaldá

ja heavaha,

dat billistivččii buot mii olbmos lea.

₁₃Leango mun badjelgeahččan

iežan šláva dahje šlávvanissona

vuoigatvuođa,

go sus lea leamaš nággu muinna?

₁₄Jos lean dahkan nu,

de maid dagašin dalle go Ipmil čuožžila,

maid dajašin go son bidjá mu vástidit?

₁₅Son gii eadnán goaŧus

attii munnje hámi,

hábmii maiddái mu bálvaleddjiid.

Mii leat ovttahat gieđa duojit.

₁₆Leango mun biehttalan

váivvášis veahki,

čáskadan čuovgga leaskka čalmmiin?

₁₇Leango mun borran láibán okto

inge leat juogadan dan oarbásiin?

₁₈In de leat, nuorravuođa rájes

mun lean biebman oarbásiid dego áhčči,

álggu rájes lean veahkehan leaskkaid.

₁₉Diktengo mun vártnuheami

leat biktasiid haga,

nu ahte váivvášis ii lean

mainna gokčat iežas?

₂₀Iigo son buressivdnidan mu,

go biktalii mu lábbáid ulluiguin?

₂₁Leango mun bajidan gieđa

oarbása vuostá

go dihten ahte vuoittán dikkis?

₂₂Jos lean dahkan dan,

de gahččos mu oalgi eret beađbbis,

mannos mu giehta eret lađđasis!

₂₃Dalle mun balašin

ahte Ipmil dagaha lihkuhisvuođa,

ahte in ceavzzáše su allatvuođa ovddas.

₂₄Leango mun dorvvastan gollái,

leango dadjan dasa:

“Dutnje mun luohtán”?

₂₅Leango mun illudan

danne go mu riggodat lea stuoris,

ja danne go lean oamastan nu ollu?

₂₆Leango geahččan beaivváža

go dat báitá,

dahje mánu go dat hearvásin

vádjola ovdan,

₂₇nu ahte mu váibmu čihkosis

fillehalai máidnut daid cummáiguin.

₂₈ Dat livččii leamaš

vearredahku mii ráŋggáštuvvo,

dalle mun livččen biehttalan

Ipmila allagasas.

₂₉Mun in leat illudan

vašálažžan oasehisvuođas

inge ávvudan, go lihkuhisvuohta

deaividii su.

₃₀In leat goassege diktán

iežan njálmmi suddudit,

in leat garuhemiin sávvan

iežan vašálačča jápmit.

₃₁Mu dálu olbmot lávejedje dadjat:

“Mis ii leat goassege váilon

biergu su beavddis.”

₃₂Ii oktage vieris dárbbašan idjadit olgun,

mu uksa lei rabas mátkálažžii.

₃₃Mun in leat gokčan suttuidan

nugo máŋgasat dahket,

in leat čiehkan rihkkumiiddán

iežan ohcii.

₃₄Danin mun in bala olbmuin,

in suorgan fulkkiidan bilkku dihte,

in oro jávoheapmin iežan viesus.

₃₅Vare soamis guldalivččii mu!

Mun lean dadjan dan maid áigon.

Vare Buotveagalaš vástidivččii munnje!

Jos mu vuostálasti čálášii

áššáskuhttinčállaga,

₃₆de mun guottášin dan olggiid alde,

čanašin dan gudnegierdun

iežan oaivvi birra!

₃₇Mun vástidivččen juohke lávkkis,

lahkanivččen sutnje ráđđejeaddji láhkái.

₃₈Jos mu bealdu váidá mu

ja buot dan jorgunluottat čirrot,

₃₉jos mun almmá mávssu haga

lean loaktán dan šattu

ja ožžon dan šuohkkit,

₄₀de šaddoset das munnje

nisuid sadjái bastilislánját,

bivggiid sadjái árvvohis rásit!