1Elihu sártnui ain:
2Leago du mielas riekta
ahte dajat: “Mun lean vuoigadis,
Ipmil vearis!”
3Dahje ahte jearat: “Maid mu ábuha
ahte lean vanhurskkis,
mii ávkkiid munnje lea das
ahte in suddut?”
4Mun vástidan dál dutnje
ja du ustibiiddage.
5Geahčas bajás albmái,
geahča balvvaide mat leat guhkkin badjin!
6Jos suddudat,
de maid don dainna dagat Ipmilii?
Jos du rihkkumat leat eatnagat,
de maid don dainna veaját sutnje?
7Jos leat vanhurskkis,
de maid don dainna attát sutnje,
maid son oažžu du gieđas?
8Du bahávuohta čuohcá dušše olbmuide,
du iežat láhkásaččaid ávkkuha dat
ahte ealát riekta.
9Olbmot váidalit veahkaválddi ja soardima,
sii čurvot veahki fámolaččaid vuostá.
10Muhto ii oktage jeara:
“Gos lea Ipmil, mu sivdnideaddji,
gii diktá giittuslávlagiid čuodjat ihkku,
11gii lea máhttáhan min
eambbo go eatnama elliid
ja dahkan min viisábun go almmi lottit?”
12Sii čurvot, muhto son ii vástit,
danne go sii leat bahát ja čeavlát.
13Ipmil ii gula duššálaš rohkadusaid,
Buotveagalaš ii váldde daid vuhtii.
14Velá dallege go don dajat
ahte it oainne su,
de son oaidná du ášši.
Vuordde su, Job!
15Muhto go Ipmil dal ii ráŋggáš moaristis
iige beroš stuorra sániin,
16de Job beassá sárdnut duššiid
ja cealkit dáidemeahttun sániid.
