Job 38

₂Gii lea dát gii sevnnjodahttá

mu áigumuša jierpmehis sániidisguin?

₃Ráhkkan, bealuš iežat dego olmmái!

Mun jearan dál dus, ja don vástidat.

₄Gos ledjet dalle

go mun bidjen eatnama vuođđudusa?

Muital munnje, jos dieđát!

₅Gii mearridii eatnama mihtuid?

Almma don dan dieđát?

Gii njulgii mihttobátti dan badjel?

₆Gosa luitojuvvojedje dan vuođđobáccit?

Gii bijai sadjásis dan čiehkageađggi,

₇go buot guovssonásttit ávvudedje

ja ipmiliid bártnit čurvo ilus?

₈Gii dahpai uvssaid duohkái ábi,

go dat borššui eatniheakkas?

₉Mun adden dalle áhpái gárvun balvvaid,

giesaldahkan suhkkes mierkká.

₁₀Mun merkejin dasa ráji

ja bidjen dan ovdii poarttaid ja bummaid,

₁₁mun celken: “Dán rádjái,

muhto it guhkibuidda!

Dása cuovkanit du čeavlás bárut.”

₁₂Leatgo don oktiige gohččon iđida ovdan,

leatgo čájehan iđitguksui dan saji,

₁₃vai dat dohppe eatnama ravddaide

ja savdnjila eret ipmilmeahttumiid?

₁₄Dalle eanan rievdá dego láiri

masa deaddiluvvo seaila:

Buot loaiddasta ovdan dego ođđa gárvvuin.

₁₅Ipmilmeahttumiin váldojuvvo

sin čuovga,

gážžára giehta cuvkejuvvo.

₁₆Leatgo ollen ábi ádjagiidda,

leatgo vádjolan čiegus čiekŋalasaide?

₁₇Leatgo jápmima uvssat ihtán du oidnosii,

leatgo oaidnán jápminsuoivana poarttaid?

₁₈Ipmirdatgo eatnama viidodaga?

Muital áinnas, jos dovddat buot dan!

₁₉Gokko lea geaidnu čuovgasa vissui,

gos lea seavdnjadasa ássanbáiki?

₂₀Dongo lávet doalvut daid

dohko gosa dat gullet,

dongo dovddat bálgáid daid vissui?

₂₁Almma don daid dieđát,

almma don dalle juo ledjet riegádan,

donhan leat eallán nu guhká!

₂₂Leatgo leamaš

muohttaga vuorkágámmáriin,

leatgo oaidnán čuorbmasiid rájuid?

₂₃Daid mun lean seastán

áŧestusa áiggiid várás,

soađi ja dáistaleami beaivái.

₂₄Gos lea geaidnu dohko

gokko čuovga surggiida,

gos nuortabiegga leavvá miehtá eatnama?

₂₅Gii gohpá gura ráššoarvái,

gii rahpá luotta bajánii ja álddagassii?

₂₆Gii diktá arvit olbmohis eatnamii,

ávdin meahccái gos ii oktage ása?

₂₇Gii galleha ávdin guovllu čáziin,

nu ahte das rásit runiidit?

₂₈Gii lea arvvi áhčči?

Gii sahkanahttá suoldnegoaikkanasaid?

₂₉Guđe goaŧus šaddá jiekŋa,

gii riegádahttá almmi bizi,

₃₀go čázit gokčašuvvet

dego geađgelohki vuollái

ja čiekŋalasa bajildus stirdu?

₃₁Máhtátgo čuolbmadit

Nieidagihpu báttiid

dahje čoavdit Gállábártniid láhkkiid?

₃₂Dongo divttát eahketnástti

badjánit rivttes áigái,

dongo láidet Sarvaga ja dan misiid?

₃₃Dovddatgo almmi lágaid,

mearridatgo daid hearrávuođa

eatnama alde?

₃₄Veajátgo bajidit jienat balvvaid rádjái,

gohčutgo čázi valljugasvuođa

šávvat iežat badjel?

₃₅Máhtátgo vuolggahit álddagasaid,

nu ahte dat celket dutnje: “Dás mii leat!”

₃₆Gii lea bidjan viisodaga

dasa mii lea čihkosis,

gii lea addán jierpmi almmigáhppálagaide?

₃₇Gii máhttá lohkat balvvaid,

gii gurre almmi gáriid,

₃₈go eanan lea garas dego geađgi

ja muolda lea čoaltuluvvan?