Job 39

₁Dongo bivddát ledjonii sállaša,

dongo biepmat ledjončivggaid,

₂go dat čákŋet biejuidasaset

dahje vuđgŋet suovkkas?

₃Gii háhká gáranassii biepmu,

go dan nelgon čivggat ráhkot

veahki Ipmilis

ja njuikkodit duohkot deike?

₄Dieđátgo don áiggi

goas várregáica guoddá,

gozihatgo don sarvvaálddu ávttaid?

₅Dieđátgo don daid rievttes bottu,

logatgo don daid čoavjjetáiggi mánuid?

₆Dat čegŋejit, guddet misiideaset

ja de leat beassan bákčasiinniset.

₇Daid miesit sturrot ja givrot meahcis,

ruohtastit eret eaige šat máhca.

₈Gii lea luoitán meahcceásena

veaittalassii,

gii lea čoavdán dan báttiid?

₉Mun adden dasa duolbadasa viessun,

sáltemeahci ássansadjin.

₁₀Dat boagusta gávpoga rieja,

ii dat gula vuojeheaddji čuorvasiid.

₁₁Dat časkkáhaddá váriin,

doppe leat dan guohtunsajit,

dat ohcá buot dan mii lea ruonas.

₁₂Gárrugo meahccevuoksá bálvalit du,

dáhttugo dat idjadit du kruppá bálddas?

₁₃Sáhtátgo bágget dan

suittehiiguin jorgunluddii,

fidnetgo dan hárvet duolbadasa?

₁₄Duosttatgo luohttit

dan stuorra givrodahkii,

oskkildit dasa buot rahčamiiddát?

₁₅Gáttátgo dainna rádjat šattuidat,

datgo buktá du gortniid

gordneráidnensadjái?

₁₆Struhcca rámšku soajáidisguin,

muhto dan soaját eai leat

dego háigira ja fálli soaját.

₁₇Dat monne eatnamii

ja diktá moniidis hávdašuvvat sáddos.

₁₈Ii dat jurddaš ahte juolgi

sáhttá njuvddestit daid cuovkkas

ja meahcispiret vedjet daid cuvket.

₁₉Dat lea garas čivggaidasas,

dego dat eai oppa livččege su čivggat.

Ii dat bala ahte dan rahčamuš

manná duššás.

₂₀Ipmil biehttalii das jierpmi,

ii addán dasa ipmárdusa.

₂₁Go dat girddiha ovdan,

de dat heahppášuhttá heastta

ja riidejeaddji.

₂₂Dongo leat addán hestii dan fámu,

dongo leat gárvvuhan

dan čeabeha livjáheaddji hárješuovkkain?

₂₃Dongo oahpahit dan njuikkodit

dego rásselohkku?

Dan gorges rusádeapmi suorggaha.

₂₄Dat guohkká eatnama jierrásit,

dat falle vašálačča vearjjuid vuostá.

₂₅Dat boagusta vára iige suorgan,

ii dat báhtar miehkis.

₂₆Dan birra šuvvet njuolat,

šealgu sáiti ja sábel.

₂₇Deama ja juma dat vuolgá johtui,

ii dat leat caggamis go dorve čuodjá.

₂₈Dat šnjirgu jitnosit

go gullá dorvve čuodjamin,

juo guhkkin dat áicá soađi,

oaivámuččaid gohččunjienaid

ja soahtečuorvasiid.

₂₉Du jierbmigo bidjá fálli girdilit,

go dat lebbe soajáid ja dolle lulás?

₃₀Gohčutgo don goaskima

badjánit áibmui

ja hukset beasi allagassii?

₃₁Dat ássá bávtti alde,

doppe lea dan idjasuodji,

bajimusas várrečohkas.

₃₂Doppe dat várdáda borramuša,

guhkkin dan čalmmit oidnet maid fallehit.

₃₃Dan čivggat borret varrás sállaša,

gos fal ráppit, doppe datnai.

₃₅Áigugo láiti sivahaddat Buotveagalačča?

Dat gii láitá Ipmila, ferte vástidit!

₃₇Mun lean headju,

maid mun máhtášin vástidit dutnje?

Mun bijan gieđa njálmmi ovdii.

₃₈Oktii mun sárdnon inge šat jietnat,

guovtte geardde, inge šat daja maidege.