Job 40

₂Boahkánastte alimiid, leage olmmái!

Dál mun jearan, ja don vástidat.

₃Dagatgo don duššin

mu vuoiggalašvuođa,

sivahatgo mu áššálažžan

vai ieš beasat leat vuoigadis?

₄Leago du giehta nugo Ipmila giehta,

jupmágo du jietna su jiena láhkái?

₅Čiŋat dalle allatvuođain

ja stuorisvuođain,

gárvot gudni ja hearvásvuođa!

₆Divtte iežat moari govdat,

geahčas goargadiidda ja cuvke sin!

₇Sojat goarggastalliid geahčastagainat,

duolmma ipmilmeahttumiid eatnamii!

₈Govčča sin buohkaid muldii,

čiega sin seavdnjadassii!

₉Dalle munge rámidan du,

du iežat gieđa fápmuhan

lea máhttán veahkehit du.

₁₀Oainnátgo Behemota?

Mun lean sivdnidan dan,

nugo mun lean sivdnidan duge.

Dat guohtu rási dego vuoksá.

₁₁Geahča dan alimiid fámu

ja dan čoavjedehkiid givrodaga!

₁₂Dan seaibi lea starggas

dego sedermuorra,

dan čoarbbeliid suonat

leat čavgadit bárgiduvvon.

₁₃Dan dávttit leat dego bronsabohccit,

dan dákteriggi nugo ruovdestákkut.

₁₄Dat lea ovddimuš Ipmila sivdnádusain,

sivdnideaddji lea addán dasa miehki.

₁₅Várit šaddadit dasa biepmu,

buot meahcispiret duhkoraddet dan lahka.

₁₆Dat vuoiŋŋada lotusmuoraid vuolde,

hoaššaid gaskkas, suonju čiegás.

₁₇Lotusmuorat fállet dasa suoivana,

gátti sieđggat čihket dan.

₁₈Dat ii ballá vaikko johka mo dulvvaš,

dat lea oadjebas vaikko vel Jordan šávašii

dan njálmmi njeaiga.

₁₉Gii duostá fallehit dan dan oaidnut

ja geassit bátti dan njunneráiggiid čađa?

₂₀Sáhtátgo bivdit Leviatana vuokkain,

máhtátgo bidjat dasa njálbmeruvddiid?

₂₁Bijatgo bessodaga dan njunnái,

čuggetgo roahki dan olloliid čađa?

₂₂Átnugo dat dus árpmu,

sárdnugo dat dutnje litnásit?

₂₃Dahkágo dat duinna lihtu,

válddátgo dan šlávvan agibeaivái?

₂₄Duhkorattatgo don dainna dego lottiin,

divttátgo iežat nieiddažiid

láidet dan báttis?

₂₅Vuovdalitgo bivdosearvvi olbmát dan,

jođihitgo gávpeolbmát dan ruvjjiid?

₂₆Sáhtátgo čuoggut

dievva sáittiid dan náhkkái

ja čugget árena dan oaivái?

₂₇Geahččalmat fallehit dan!

Dan soađi it vajáldahte

itge dáhto dahkat dan nuppádis.

₂₈Muđui gal beahtahalat,

juo dan oaidnimisge

olmmoš gahččá eatnamii.