Job 41

₁Dat lea ilá hirpmus,

ii oktage leat nu jállu

ahte duosttašii hárdit dan.

Gii duostá loaiddastit dan ovdii?

₂Gii máhttá dearvan hástalit dan,

gii oppa almmi vuolde?

₃Mun muitalan vel

makkárat leat dan lahtut,

makkár dan fápmu

ja man imašlaš dan hápmi.

₄Gii nuollá dan olgguldasgárvvu,

gii ráigá dan guovttegeardásaš gara?

₅Gii rahpá dan soalvvi?

Dan bániin lea balddáhus.

₆Čielggis das leat galbaráiddut,

giddejuvvon lávga dego seaillain.

₇Nubbi lávgá nuppiin,

ii jiellage beasa daid gaskka.

₈Galbbat leat gittalagaid,

dat roahkkásit oktii eaige earránatta.

₉Go dat russu, dalle šleađgu čuovga,

dan čalmmit báitet dego iđitroađđi.

₁₀Buolli dolla girdá dan njálmmis,

das riššet čuotnamat.

₁₁Dan njunneráiggiin badjána suovva

dego báhkaduvvon, duoldi ruittus.

₁₂Dan vuoiŋŋanas cahkkeha čađaid,

dolla njuoršu dan njálmmis.

₁₃Fápmu orru dan niskkis,

ballu viehká dan ovddabeale.

₁₄Dan čoavjji máhcit leat stargasat,

dat leat dego leikejuvvon eaige lihkas.

₁₅Dan raddi lea garas nugo geađgi,

garas dego vuolit millogeađgi.

₁₆Go dat čuožžila, de fámolaččat soiget,

meara doajáhagatge báhtarit das.

₁₇Falleheaddji miehkki ii bastte dasa,

ii sáiti, skohtal iige njuolla.

₁₈Ruovdi lea dasa nugo oalga

ja bronsa dego mieska muorra.

₁₉Njuolla ii balddit dan báhtarussii,

šleŋggona geađggit leat dasa dego sáđđu.

₂₀Dat atná šluppoha oalgan,

sábeliid skála dat dušše boagusta.

₂₁Čoavjji vuolde das leat bastilis biikkat,

dat johtá rábihis dego gordneluvvenreahka.

₂₂Dat duldeha čiekŋalasa dego ruittu,

dat dahká ábi duoldi vuoiddasgievdnin.

₂₃Dan maŋŋái báhcá čuovgi bálggis,

dego čiekŋalas livččii ožžon čurges vuovttaid.

₂₄Nubbi dan láhkásaš ii leat eatnama alde,

dat lea sivdniduvvon dakkáražžan

mii ii suorgan.

₂₅Čeavlátge ballet das,

dat lea buot goargadis spiriid gonagas.