Jona 3

₁Hearrá sátni bođii Jonai nuppádassii:

₂“Vuolgge Ninivei, dan stuorra gávpogii, ja sártnit doppe dan sága maid mun cealkkán dutnje.” ₃Jona vulggii Ninivei, nugo Hearrá lei gohččon.

Ninive lei hui stuorra gávpot, golbma beaivása ravddas nubbái. ₄Jona vázzigođii gávpogis vuosttaš beaivása ja čuorvvui: “Njealljelogi beaivvi vel, de Ninive duššaduvvo!” ₅Ja Ninive olbmot osko dan sáhkii maid Ipmil lei cealkán. Sii gulahedje fásttu ja buohkat, stuorrát ja smávvát, gárvodedje horstta.

₆Go Ninive gonagas gulai Jona sániid, de son čuožžilii truvdnostuolustis, nuolai oalgebiktasa, gárvodii horstta ja čohkánii gavjjaid sisa. ₇Son čuorvvuhii Ninives: “Dát lea gonagasa ja su oaivámuččaid gohččun: Ii oktage, eai olbmot eaige šibihat, eai stuorraoamit eaige smávvaoamit oaččo muosáhit maidege. Šibihiid ii oaččo luoitit guohtut eaige dat oaččo juhkat čázi. ₈Sihke olbmuide ja šibihiidda galgá gárvvuhit horstta, ja buohkat galget čuorvut Ipmila olles fámuin. Sii galget jorgalit bahás geainnusteaset ja veahkaválddis maid dahket. ₉Gii diehtá? Ipmil sáhttá jorggihit ja gáhtat, ja diktit buolli moaris coahkut, vai mii eat dušša.” ₁₀Go Ipmil oinnii ahte sii jorgaledje bahás vádjolusasteaset, de son gáđai iige duššadan ninivelaččaid, vaikko lei áigon.