Jona 4

₁Muhto Jona anii dan hui bahán, ja son suhtai. ₂Son rohkadalai Hearrá ja dajai: “Vuoi Hearrá! Ingo mun juo dadjan dan, go ledjen ain ruovttueatnamisttán! Aiddo dan dihtehan mun geahččalinge vuos báhtarit Taršišii. Mun dihten ahte don leat árbmugas ja váibmoláđis Ipmil, don leat gierdavaš ja du buorrevuohta lea stuoris. Don leat gearggus gáhtat bahá mainna áittát, nu ahte lihkuhisvuohta ii boađe. ₃Ja dál, Hearrá, váldde juo mu heakka! Buoret munnje lea jápmit go eallit.” ₄Muhto Hearrá jearai: “Leago du suhttu vuoigat?”

₅Jona lei mannan olggos gávpogis ja čohkánan dan nuorttabeallái. Dasa son lei dahkan alccesis lastagoađi ja čohkánan dan suoivanii, vai beassá oaidnit mo gávpogii geavvá.

₆Dalle Hearrá Ipmil divttii risiidnašattu šaddat Jona badjel ja suoivanastit su oaivvi, vai su lossa miella geahppu. Risiidnašaddu illudahtii Jona sakka. ₇Muhto maŋit beaivvi go iđedisroađđi badjánii, de Ipmil divttii máđu jursit risiidnašattu, nu ahte dat ásttai. ₈Go beaivváš badjánii, de Ipmil vuolggahii báhkka nuortabiekka, ja beaivváš gorddii Jona oaivvi, nu ahte son vuoimmehuvai. Dalle Jona sávai alccesis jápmima ja dajai: “Buoret munnje lea jápmit go eallit.” ₉Muhto Ipmil celkkii Jonai: “Leago du suhttu risiidnašattu dihte vuoigat?” Jona vástidii: “De lea, mu suhttu lea vuoigat gitta jápmima rádjái.” ₁₀Hearrá celkkii: “Don árkkálmasttát šattu mainna it leat váivašuvvan ja maid it leat šaddadan, mii ovtta ija šattai ja nuppi ija billašuvai. ₁₁Ingo mun dalle árkkálmasttáše Ninive, dan stuorra gávpoga, gos leat eambbo go čuođiguoktelogiduhát olbmo geat eai máhte earuhit olgeš beali gurut bealis, ja vel eatnat šibihat?”