Josua 14

₁Dát leat dat guovllut maid israellaččat ožžo opmodahkan Kanaanis ja maid báhppa Elasar ja Josua, Nuna bárdni, ja Israela čearddaid bearašoaivámuččat juogadedje sidjiide. ₂Sii juogadedje eatnama opmodahkan vuorbádemiin ovcci čerdii ja ovtta čeardabeallái, nugo Hearrá lei gohččon Mosesa bokte. ₃Moses lei juo addán guovtti čerdii ja ovtta čeardabeallái eatnama don bealde Jordana, muhto levilaččaide son ii addán eatnama opmodahkan. ₄Josefa nálli juohkásii guoktin čeardan, Manassen ja Efraimin. Levilaččat eai ožžon oasi eatnamis, muhto sii ožžo gávpogiid ássanbáikineaset ja daid guohtuneatnamiid omiideaset várás. ₅Go israellaččat juogadedje eatnama, de sii barge aiddo nugo Hearrá lei gohččon Mosesa.

₆Juda čeardda olbmát loaiddastedje Josua ovdii Gilgalis, ja kenisselaš Kaleb, Jefunne bárdni, dajai sutnje: “Donhan dieđát maid Hearrá sártnui Mosesii, Ipmila olbmái, mu ja du hárrái go leimmet Kadeš Barneas. ₇Mun ledjen njealljelogijahkásaš go Hearrá bálvaleaddji Moses vuolggahii mu Kadeš Barneas iskkadit eatnama, ja mun muitalin sutnje vuoiga maid ledjen oaidnán. ₈Mu vieljat geat ledje muinna doppe, hearddohuhtte álbmoga, muhto mun ledjen oskkáldas Hearrái, Ipmilasan. ₉Dan beaivvi Moses vuortnui dán váli: Dat eanan gosa du juolgi lea duolmmastan, lea agálaččat du ja du náli opmodat, dainna go don leat leamaš oskkáldas Hearrái, mu Ipmilii. ₁₀Ja dego don oainnát, de Hearrá lea doallan lohpádusas. Son lea diktán mu eallit dan njealljelogivihtta jagi mat leat gollan dan rájes go son sártnui dán áššis Mosesii, oppa dan áiggi maid Israel vádjolii meahcis. Mun lean dál gávccilogiviđajahkásaš ₁₁ja lean ain seammá gievra go dan beaivvi go Moses vuolggahii mu. Mun nagodan soahtat dál seammá bures go dalle. ₁₂De atte munnje dál dan várreeatnama maid Hearrá dalle lohpidii munnje. Donhan gullet dalle ahte doppe leat stuorra ladnegávpogat gos ásset anaklaččat. Hearrá lea muinna, nu ahte mun nagodan váldit sin eatnama, nugo son lohpidii.”

₁₃Dalle Josua buressivdnidii Kaleba, Jefunne bártni, ja attii sutnje Hebrona opmodahkan. ₁₄Nu kenisselaš Kaleb, Jefunne bárdni, oaččui Hebrona opmodahkanis, danin go son lei leamaš oskkáldas Hearrái, Israela Ipmilii. Hebron lea su opmodat vel otná beaivvinai. ₁₅Hebrona namma lei dolin Kirjat Arba, danin go Arba lei anaklaččaid stuorimus olmmái.

Sođiid maŋŋil eatnamis lei dál ráfi.