Josua 15

₁Vuorbádeamis Juda čearda oaččui sogaidasas eatnama mii áibbas lullin Sinmeahcis olii Edoma rádjái. ₂Eatnama lullerádji álgá Jápmameara geažis, dan luovtta rájes mii lea lulimussan, ₃ja manná Akrabbimgorgŋehaga lulábeale Sinii ja doppe Kadeš Barnea lullelis Hesronii ja das ain Addarii gos dat gávvá Karka guvlui. ₄Dasto dat manná Asmonii ja das ain Egypta rádjájohkii ja dan mielde áhpái. Dát lea Juda čeardda lullerádji.

₅Nuortarádjin lea Jápmamearra gitta Jordannjálbmái. Davverádji álgá dan luovttas gosa Jordan luoitá, ₆ja manná bajás Bet-Hoglai ja dasto Bet-Haaraba davábeale gitta Bohana, Rubena bártni, geađggi rádjái. ₇Dasto rádji manná Akorleagis bajás Debirii ja gávvá davás Gelilotii mii lea Adummimgorgŋehaga buohta, jogaža lullelis, dasto Šemešádjagii ja das ain Rogeládjagii. ₈Dasto rádji manná ain bajás Ben-Hinnoma leagi jebuslaččaid várrevieltti dahjege Jerusalema lulábeale, ja doppe fas dan várrečohkkii mii lea Hinnomleagi oarjjabealde Refaimleagi davágeažis. ₉Várrečohkas rádji gávvá Neftoahádjagii, manná das Efrona várreeatnama gávpogiidda ja dasto gával Baalai dahjege Kirjat-Jearimii. ₁₀Baalas rádji gávvá oarjjás Seirvárrái ja manná dasto Jearimvári davágeaži dahjege Kesalona badjel ja ain vuolás Bet-Šemešii ja de Timna guora. ₁₁Dasto rádji manná Ekronvári davágeaži vieltái ja gávvá Šikkeronii, de Baalavári guora Jabneelii ja das áhpái. ₁₂Oarjerádjin lea Stuorramearra. Dat leat Juda čeardda sogaid eatnamat.

₁₃Kalebii, Jefunne bárdnái, Josua attii eatnama Juda čeardda eatnama siste, nugo Hearrá lei gohččon Josua. Kaleb oaččui Hebrona dahjege Kirjat-Arba mii lei anaklaččaid máttu Arba gávpot. ₁₄Kaleb duššadii doppe Šešaja, Ahimana ja Talmaja sogaid, Anaka náli. ₁₅De son soahttái Debira ássiiguin; Debira namma lei dolin Kirjat-Sefer. ₁₆Kaleb dajai: “Mun attán nieidan Aksa áhkkán dasa gii falleha Kirjat-Sefera ja váldá dan.” ₁₇Otniel, Kaleba vielja Kenasa bárdni, válddii gávpoga, ja Kaleb attii sutnje nieiddas Aksa áhkkán. ₁₈Go Aksa bođii dohko, de son mearridii sártnuhit áhčis addit sudnuide eambbo eatnama. Aksa luoitádii ásena čielggis, ja Kaleb jearai: “Maid don dáhtut?”. ₁₉Aksa vástidii: “Atte munnje earroattáldaga. Don leat addán munnje Negevmeahci, atte munnje vel gálduid.” Dalle Kaleb attii sutnje Badjegálduid ja Vuollegálduid.

₂₀Dat lea Juda čeardda sogaid opmodat. ₂₁Dát leat Juda čeardda ravdaguovllu gávpogat Edoma ráji lahka Negevis: Kabseel, Eder, Jagur, ₂₂Kina, Dimona, Adada, ₂₃Kedeš, Hasor, Jitnan, ₂₄Sif, Telem, Bealot, ₂₅Hasor-Hadatta, Kerijot-Hesron dahjege Hasor, ₂₆Amam, Šema, Molada, ₂₇Hasar-Gadda, Hešmon, Bet-Pelet, ₂₈Hasar-Šual, Beer Šeba oktan birasbáikkiidisguin, ₂₉Baala, Ijim, Esem, ₃₀Eltolad, Kesil, Horma, ₃₁Siklag, Madmanna, Sansanna, ₃₂Lebaot, Šilhim, Ajin ja Rimmon, oktiibuot guoktelogiovcci gávpoga oktan birasbáikkiideasetguin.

₃₃Šefelas: Eštaol, Sora, Ašna, ₃₄Sanoah, En-Gannim, Tappuah, Enam, ₃₅Jarmut, Adullam, Soko, Aseka, ₃₆Šaarajim, Aditajim, Gedera ja Gederotajim, njealljenuppelohkái gávpoga oktan birasbáikkiideasetguin; ₃₇Senan, Hadaša, Migdal-Gad, ₃₈Dilan, Mispe, Jokteel, ₃₉Lakiš, Boskat, Eglon, ₄₀Kabbon, Lahmas, Kitliš, ₄₁Gederot, Bet-Dagon, Naama ja Makkeda, guhttanuppelohkái gávpoga oktan birasbáikkiideasetguin; ₄₂Libna, Eter, Ašan, ₄₃Jefta, Ašna, Nesib, ₄₄Keila, Aksib ja Mareša, ovcci gávpoga oktan birasbáikkiideasetguin; ₄₅Ekron oktan birasgávpogiiddisguin ja birasbáikkiidisguin, ₄₆Ekronis oarjjás buot gávpogat oktan birasbáikkiideasetguin Ašdoda lahka, ₄₇Ašdod oktan birasgávpogiiddisguin ja birasbáikkiiddisguin, Gaza oktan birasgávpogiiddisguin ja birasbáikkiiddisguin gitta Egypta rádjejoga ja Stuorrameara rádjái.

₄₈Várreeatnamis: Šamir, Jattir, Soko, ₄₉Danna, Kirjat-Sanna dahjege Debir, ₅₀Anab, Eštemoa, Anim, ₅₁Gošen, Holon ja Gilo, oktanuppelohkái gávpoga oktan birasbáikkiideasetguin; ₅₂Arab, Duma, Ešan, ₅₃Janum, Bet-Tappuah, Afeka, ₅₄Humta, Kirjat-Arba dahjege Hebron, ja Sior, ovcci gávpoga oktan birasbáikkiideasetguin; ₅₅Maon, Karmel, Sif, Jutta, ₅₆Jisreel, Jokdeam, Sanoah, ₅₇Kain, Gibea ja Timna, logi gávpoga oktan birasbáikkiideasetguin; ₅₈Halhul, Bet-Sur, Gedor, ₅₉Maarat, Bet-Anot ja Eltekon, guhtta gávpoga oktan birasbáikkiideasetguin; Tekoa, Efrata dahjege Betlehem, Peor, Etam, Kulon, Tatam, Šoreš, Kerem, Gallim, Beter ja Manoho, oktanuppelohkái gávpoga oktan birasbáikkiideasetguin; ₆₀Kirjat-Baal dahjege Kirjat-Jearim ja Rabba, guokte gávpoga oktan birasbáikkiideasetguin.

₆₁Meahcis: Bet-Haaraba, Middin, Sekaka, ₆₂Nibšan, Ir-Hammelah ja En-Gedi, guhtta gávpoga oktan birasbáikkiideasetguin.

₆₃Jebuslaččaid geat ásse Jerusalemis, Juda čearda ii nagodan duššadit, muhto sii ásset Juda čeardda gaskkas Jerusalemis vel otná beaivvinai.