Josua 16

₁Josefa nálli oaččui vuorbádeamis eatnama Jordangáttis Jeriko lahka, dan meahcis mii lea Jeriko ádjagiid nuorttabealde. Jerikos rádji manná váriid mielde Betelii. ₂Betelis dat manná Lusii ja doppe arkilaččaid eatnamii Atarotii, ₃gos dat njiedjá oarjjás jafletlaččaid eatnamii Vuolit Bet-Horona guovllu rádjái ja de Geserii ja dasto merrii.

₄Dán guovllu oaččuiga opmodahkan Josefa bártnit Manasse ja Efraim. ₅Efraima čeardda sogat ožžo opmodahkan dán guovllu: Sin opmodaga rádji vuolgá Atrot Addaris nuortan ja manná Bajit Bet-Horonii ₆ja dasto merrii. Davvin rádji gávvá Mikmetatis nuorttas Taanat-Šiloi ja doppe nuorttas Janoahii. ₇Janoahis rádji njiedjá Atarotii ja Naarai, manná de Jerikoi ja dasto Jordanii. ₈Tappuahis rádji manná oarjjás Kanajogažii ja dasto merrii. Dát lea dat opmodat mii bođii Efraima čeardda sogaide. ₉Dasa lassin dat ožžo vel buot daid gávpogiid ja daid birasbáikkiid mat sirrejuvvojedje sidjiide Manasse čeardda eatnama siste. ₁₀Muhto efraimlaččat eai duššadan kanaanlaččaid geat ásse Geseris. Ain otná beaivvige kanaanlaččat ásset efraimlaččaid gaskkas, muhto sii gártet bargat bággobarggu.