Josua 18

₁Oppa Israela searvegoddi čoahkkanii Šiloi ja ceggii dohko almmustusgoađi. Sii ledje dál váldán eatnama. ₂Muhto de ledje vel čieža Israela čeardda mat eai lean ožžon opmodagaset. ₃Josua dajai israellaččaide: “Man guhká dii áigubehtet ájahallat váldimis dan eatnama maid Hearrá, din áhčiid Ipmil, lea addán didjiide? ₄Válljejehket juohke čearddas golbma olbmá, geaid mun sáhtán vuolggahit johtit miehtá eatnama ja válddahit čearddaide heivvolaš guovlluid. De sii galget máhccat mu lusa. ₅Sii galget juogadit eatnama čiežan oassin. Juda čearddas lea juo iežas guovlu lullin ja Josefa sogas davvin. ₆Dii galgabehtet dahkat čilgehusa eatnama čieža oasis ja buktit čilgehusa munnje, de mun vuorbádan osiid didjiide dáppe Hearrá, min Ipmila, muođuid ovddas. ₇Levilaččat eai oaččo oasi nugo dii earát, Hearrá báhppavuohta lea sin opmodat. Gada ja Rubena čearddat ja Manasse čeardabealle leat juo ožžon opmodagaset Jordana nuorttabealde, dan oasi maid Moses, Hearrá bálvaleaddji, attii sidjiide.” ₈Ovdal go olbmát vulge, de Josua gohčui sin válddahit eatnama: “Vádjolehket miehtá eatnama ja dahket das čilgehusa. Máhccet dasto mu lusa, de mun vuorbádan dan didjiide Hearrá muođuid ovddas dáppe Šilos.” ₉De olbmát johtigohte miehtá eatnama ja čálle girjái čilgehusa eatnama čieža oasis, juohke gávpogis. Dasto sii máhcce Josua lusa Šilo siidii. ₁₀Josua vuorbádalai osiid israellaččaide Hearrá muođuid ovddas Šilos ja juogadii eatnama israellaččaide, nu ahte juohke čearda oaččui iežas oasi.

₁₁Vuorbi gahčai vuos Benjamina čeardda sogaide. Dat eanan maid vuorbi attii daidda, lea Juda ja Josefa čearddaid gaskkas. ₁₂Daid rádji davvin álgá Jordanis ja badjána Jeriko davábeale várrevieltái ja manná de oarjjás váriid mielde ja meahccái Bet-Avena gurrii. ₁₃Doppe rádji manná Lusii, Lusa dahjege Betela lulábeale várrevieltái ja dasto vuolás Atrot-Addarii dan vári vuolde mii lea lullelis Vuolit Bet-Horona. ₁₄Dasto rádji manná gával ja gávvá oarjin lulás guvlui dan váris mii lea Bet-Horona lulábealde, ja de Kirjat-Baalii dahjege Kirjat-Jearimii, gávpogii mii gullá Juda čerdii. Dát lea oarjjabealli. ₁₅Lulábealde rádji álgá Kirjat-Jearima ravddas ja manná Ijimii ja das ain Neftoahádjagii. ₁₆Doppe rádji manná dan vári vuollái mii lea Ben-Hinnoma leagi lahka, Refaimleagi davábealde, das vuolás Hinnomleahkeráigge dan várrevieltti lulábeale mii gullá jebuslaččaide, ja das ain Rogeládjagii. ₁₇Doppe rádji gávvá davás ja manná Šemešádjagii ja Gelilotii mii lea Adummimgorgŋehaga buohta, ja njiedjá de Bohana, Rubena bártni, geađggi lusa. ₁₈Das rádji manná várrevieltái Bet-Haaraba davábeale ja njiedjá Jordanleahkái. ₁₉Doppe rádji manná dan várrevieltái mii lea Bet-Hogla davábealde ja nohká Jápmameara davveluktii, Jordana njálbmái. Dát lea lullerádji. ₂₀Nuortan eatnama rádjin lea Jordan. Dat lea Benjamina čeardda sogaid opmodat ja rájit dan birra.

₂₁Benjamina čeardda sogaide bohte dát gávpogat: Jeriko, Bet-Hogla, Emek-Kesis, ₂₂Bet-Haaraba, Semarajim, Betel, ₂₃Avvim, Para, Ofra, ₂₄Kefar Haammoni, Ofni ja Geba, guoktenuppelohkái gávpoga oktan birasbáikkiideasetguin, ₂₅Gibeon, Rama, Beerot, ₂₆Mispe, Kefira, Mosa, ₂₇Rekem, Jirpeel, Tarala, ₂₈Sela, Elef, Jebus dahjege Jerusalem, Gibea ja Kirjat-Jearim, njealljenuppelohkái gávpoga oktan birasbáikkiideasetguin. Duot lea Benjamina čeardda sogaid opmodat.