Josua 19

₁Nubbi vuorbi gahčai Simeona čeardda sogaide. Dat ožžo eatnama Juda čeardda eatnama siskkobealde. ₂Sin opmodahkii gulle dát gávpogat: Beer Šeba, Šema, Molada, ₃Hasar-Šual, Bala, Esem, ₄Eltolad, Betul, Horma, ₅Siklag, Bet-Hammarkabot, Hasar-Susa, ₆Bet-Lebaot ja Šaruhen, golbmanuppelohkái gávpoga oktan birasbáikkiideasetguin, ₇ja Ajin, Rimmon, Eter ja Ašan, njeallje gávpoga oktan birasbáikkiideasetguin, ₈ja vel buot báikkit mat ledje daid gávpogiid birra gitta Baalat-Beerii ja Ramatii Negevis. Dat guovlu šattai Simeona čeardda sogaid opmodahkan. ₉Simeona čearda oaččui opmodaga Juda čeardda oasis, danin go Juda čeardda oassi lei stuorit go maid sii dárbbašedje. Danin Simeona čearda oaččui opmodaga Juda eatnama siskkobealde.

₁₀Goalmmát vuorbi gahčai Sebulona čeardda sogaide. Dat eanan maid sii ožžo opmodahkan, olii gitta Sarida rádjái. ₁₁Sin rádji manná das oarjjás Maralai ja das Dabbešetii ja dan jogažii mii lea Jokneama luhtte. ₁₂Saridis nuorttas rádji manná Kislot-Tabora guovllu rádjái ja doppe Daberatii ja ain bajás Jafiai. ₁₃Doppe rádji manná nuorttas Gat-Heferii ja Et-Kasinii ja das ain Rimmonii ja gávvá de Neai. ₁₄Das davverádji manná Hannatonii ja boahtá dan leahkái gos lea Jiftah-El. ₁₅Dasa lassin sebulonlaččaide bohte Kattat, Nahalal, Šimron, Jidala ja Betlehem, guoktenuppelohkái gávpoga oktan birasbáikkiideasetguin. ₁₆Sebulona čeardda sogat ožžo opmodahkan dan guovllu ja daid gávpogiid oktan birasbáikkiideasetguin.

₁₇Njealját vuorbi gahčai Isaskara čeardda sogaide. ₁₈Daid eatnamii gulle Jisreel, Kesulot, Šunem, ₁₉Hafarajim, Šion, Anaharat, ₂₀Rabbit, Kišon, Ebes, ₂₁Remet, En-Gannim, En-Hadda ja Bet-Passes. ₂₂Rádji manná Taborii, Šahasimii ja Bet-Šemešii ja nohká Jordanii. Dan eatnamii gullet oktiibuot guhttanuppelohkái gávpoga oktan birasbáikkiideasetguin. ₂₃Isaskara čeardda sogat ožžo opmodahkan dan guovllu ja daid gávpogiid oktan birasbáikkiideasetguin.

₂₄Viđát vuorbi gahčai Ašera čeardda sogaide. ₂₅Daid eatnamii gulle Helkat, Hali, Beten, Akšaf, ₂₆Alammelek, Amad ja Mišal. Rádji manná oarjjás Karmelii ja Šihor Libnatii ₂₇ja nuorttas Bet-Dagonii, dasto davás Sebulona eatnama rádjái ja dan leahkái gos leat Jiftah-El, Bet-Haemek ja Neiel ja doppe davás Kabulii, ₂₈Abdonii, Rehobii, Hammonii ja Kanai ja gitta stuorra Sidona rádjái. ₂₉Nuppi guovllus rádji manná Ramai ja das Tyrosa ladnegávpoga lusa, sodjá Hosai ja das merrii. Eará gávpogat leat Mahaleb, Aksib, ₃₀Akko, Afek ja Rehob, guoktelogiguokte gávpoga oktan birasbáikkiideasetguin. ₃₁Ašera čeardda sogat ožžo opmodahkan dan guovllu ja daid gávpogiid oktan birasbáikkiideasetguin.

₃₂Guđát vuorbi gahčai Naftali čeardda sogaide. ₃₃Daid rádji manná Helefis, Besaanannima terebintta rájes, Adami Hannekeba ja Jabneela bokte Lakkumii ja das Jordanii. ₃₄Das rádji manná oarjjás Asnot-Taborii ja doppe Hukokii. Lullin sin eana lea rádjálagaid Sebuloniin, oarjin Ašeriin ja nuortan Jordaniin. ₃₅Ladnegávpogat ledje Siddim, Ser, Hammat, Rakkat, Kinneret, ₃₆Adama, Rama, Hasor, ₃₇Kedeš, Edrei, En-Hasor, ₃₈Jiron, Migdal-El, Horem, Bet-Anat ja Bet-Šemeš, ovccinuppelohkái gávpoga oktan birasbáikkiideasetguin. ₃₉Naftali čeardda sogat ožžo opmodahkan dan guovllu ja daid gávpogiid oktan birasbáikkiideasetguin.

₄₀Čihččet vuorbi gahčai Dana čeardda sogaide. ₄₁Dan eatnamis maid sii ožžo opmodahkan, ledje dát gávpogat: Sora, Eštaol, Ir-Šemeš, ₄₂Šaalabbin, Ajalon, Jitla, ₄₃Elon, Timna, Ekron, ₄₄Elteke, Gibbeton, Baalat, ₄₅Jehud, Bene-Berak, Gat-Rimmon, ₄₆Me-Hajarkon ja vel Jafo birasbáikkit. ₄₇Muhto sii eai čáhkan Dana čeardda eatnamii. Danin sii vulge soahtat Lešemiin, válde dan ja godde dan ássiid. Sii válde dan opmodahkaneaset, ásse dohko ja navde dan Danin áhčiset mielde. ₄₈Dana čeardda sogat ožžo opmodahkan dan guovllu ja daid gávpogiid oktan birasbáikkiideasetguin.

₄₉Go israellaččat ledje geargan juogadeames eatnama osiide, de sii adde das opmodaga Josuai, Nuna bárdnái. ₅₀Nugo Hearrá lei gohččon, de sii adde sutnje Efraima várreeatnamis Timnat-Seraha, gávpoga maid son ieš siđai. Josua nannii gávpoga muvrrain ja ásai dohko.

₅₁Dát ledje dat eatnamat maid báhppa Elasar ja Josua, Nuna bárdni, ja Israela čearddaid bearašoaivámuččat vuorbádedje opmodahkan Hearrá muođuid ovddas almmustusgoađi uvssa guoras Šilos. Nu sii gerge juogadeames eatnama.