Josua 20

₁Hearrá celkkii Josuai:

₂Gohčo israellaččaid válljet dorvogávpogiid, nugo mun sárdnon didjiide Mosesa bokte. ₃Dakkár gávpogii olmmošgoddi sáhttá báhtarit, jos son lea goddán olbmo vahágis dahje dáhtokeahttá. Dat gávpogat leat dorvobáikkit maidda varramávssaheaddji ii beasa. ₄Dat gii báhtara dakkár gávpogii, galgá bisánit gávpotportii ja čilget vuos iežas ášši gávpoga vuorrasiidda. Sii galget luoitit su gávpogii ja addit sutnje ássanbáikki. ₅Jos varramávssaheaddji doarrida olmmošgoddi, de vuorrasat eai oaččo addit su varramávssaheaddji gihtii, dainna go son lea goddán nuppi olbmo dáhtokeahttá iige lean vašuhan su ovdal. ₆Olmmošgoddi galgá ássat dan gávpogis dassážii go searvegoddi dutká su ášši. Easkka go dat gii lea bajimusbáhppan dan áiggi, jápmá, de olmmošgoddi oažžu máhccat iežas gávpogii ja iežas vissui, dan gávpogii gos son lei vuolgán báhtui.

₇De israellaččat válljejedje dorvogávpogin Kedeša gávpoga Naftali várreeatnamis Galileas, Sikema Efraima várreeatnamis ja Kirjat-Arba dahjege Hebrona Juda várreeatnamis. ₈Don bealde Jordana, Jerikos nuorttas, sii válljejedje dorvogávpogin Rubena čeardda guovllus Besera mii lea alážis meahcis, Gada čeardda guovllus Ramota Gileadis ja Manasse čeardda guovllus Golana mii lea Bašanis. ₉Dát ledje dat gávpogat mat válljejuvvojedje dorvogávpogin buot israellaččaide ja vierrásiidda geat ásse sin gaskkas. Daidda sáhtii báhtarit juohkehaš gii lei goddán olbmo vahágis, amas gottáhallat varramávssaheaddjái ovdal go searvegoddi lei dutkan su ášši.