Josua 3

₁Árrat iđedis Josua ja israellaččat vulge johtui Šittimis ja bohte Jordangáddái. Das sii ledje muhtun áiggi ovdal go manne eanu rastá. ₂Go golbma beaivvi ledje vássán, de álbmoga njunnošat manne siidda čađa ₃ja gohččo álbmoga: “Go dii oaidnibehtet Hearrá, din Ipmila, lihtuárkka ja levilaš báhpaid guoddimin dan, de galgabehtet vuolgit johtui ja mannat árkka maŋis, ₄muhto lehkos birrasii guokteduhát állana din ja árkka gaskkas, allet mana ilá lahka dan. Čuvvot dan vai dieđášeiddet dan geainnu man dii galgabehtet mannat, dasgo dii ehpet leat mannan dan geainnu ovdal.”

₅Josua dajai álbmogii: “Basuhehket iežaideattet, dasgo ihttin Hearrá dahká oavdudaguid din gaskkas.” ₆Báhpaide son dajai: “Váldet lihtuárkka ja guddet dan álbmoga ovddas.” Báhpat dahke nugo Josua lei gohččon.

₇Hearrá celkkii Josuai: “Dán beaivvi mun dahkagoađán du stuorisin oppa Israela čalmmiin, vai sii ipmirdit ahte mun lean duinna nugo mun ledjen Mosesiin. ₈Go báhpat geat guddet lihtuárkka, leat ollen Jordangáddái, de gohčo sin lávket gáddečáhcái ja čuožžut das.”

₉Josua dajai israellaččaide: “Bohtet deike gullat Hearrá, din Ipmila, sániid.” ₁₀Dasto son dajai: “Ealli Ipmil lea din gaskkas. Dan dii diehtibehtet das ahte son duššada din ovddas kanaanlaččaid, hetlaččaid, hivvelaččaid, perisselaččaid, girgašlaččaid, amorlaččaid ja jebuslaččaid. ₁₁Oppa eatnama hearrá lihtuárka manná din ovddas Jordana rastá. ₁₂Válljejehket dál Israela čearddain guoktenuppelohkái olbmá, ovtta guđege čearddas. ₁₃Go báhpat geat guddet oppa eatnama Hearrá lihtuárkka leat lávken Jordana čáhcái, de dalle boatkkalduvvet čázit mat bohtet bajil, ja orustit oktan čopman.”

₁₄Álbmot vulggii johtui goahtesajiin vai beassá rasttildit Jordana, ja báhpat gudde lihtuárkka álbmoga ovddas. ₁₅Lei láddjenáigi, ja Jordan dulvvai badjel buot gáttiidis. Go báhpat geat gudde árkka, bohte Jordangáddái ja lávkejedje čáhcái, ₁₆de čáhci mii bođii bajil, bisánii ja orui oktan čopman guhkkin Adama gávpoga luhtte, Saretana lahka. Muhto dat čáhci mii golggai Arabameara dahjege Jápmameara guvlui, jávkkai ollásit. Nu álbmot manai Jordana rastá Jeriko buohta. ₁₇Báhpat geat gudde Hearrá lihtuárkka, čužžo goikásis gasku Jordana, ja oppa Israel manai rastá goikeeatnama mielde, dassážii go buohkat ledje rasttildan Jordana.