Nubbi lávlla
1Gal juo Hearrá lea moaristis gokčan
Siona sevdnjes balvvaiguin!
Son lea bálkestan Israela
hearvásvuođa almmis vuolás eatnamii.
Ii son seastán iežas julggiid vulloša
moaris beaivvi.
2Hearrá duššadii seasttekeahttá
buot Jakoba ássansajiid,
vašis son gaikkodii
visot Juda ladniid.
Son heavahii ja heahppášuhtii riikka
ja dan oaivámuččaid.
3Buolli moaristis son cuvkii
Israela gorges fámu,
son rohttii ruoktot suodjaleaddji gieđas
go vašálaš bođii.
Son bolddii Jakoba dego dolla
man njuokčamat loktet buot.
4Nugo vašálaš son gelddii dávggi,
gearggusin báhčit njuola.
Nugo vuostálasti son gottii buot
mii lei leamaš hávskái min čalbmái.
Nieida Siona goahtái
son golggahii iežas moari dego dola.
5Hearrá bođii vašálažžan,
son duššadii Israela,
heavahii buot dan šloahtaid
ja billistii dan ladniid.
Son devddii Juda morrašiin
ja vártnuhisvuođain.
6Son gaikkodii goađis
dego olmmoš duššada gilvvagárddi,
son billistii bassibáikkis.
Hearrá divttii feastta ja sabbaha
vajálduvvat Sionis.
Garra moaris son hilggui
gonagasa ja báhpa.
7Hearrá hilggui iežas áltára
ja guđii bassibáikkis.
Ladnemuvrraid son attii
vašálačča gihtii.
Vašálaččaid čuorvasat
skádje Hearrá viesus
dego bassebeaivvi čuorvasat.
8Hearrá mearridii billistit
Siona muvrraid.
Son čavgii mihttobátti
vai beassá gaikkodit daid,
son ii rohtten gieđa ruoktot
duššadeames.
Seainnit ja muvrrat šadde moraštit,
oktanaga dat gahčče.
9Gávpoga poarttat
leat vudjon eatnamii,
son lea cuvken ja doadján daid bummaid.
Gonagas ja oaivámuččat
leat dál vieris eatnamis,
láhka ii oahpahuvvo,
profehtat eai šat oaččo
oainnáhusaid Hearrás.
10Siona vuorrasat
čohkkájit eatnamis jávohaga.
Sii botkkuhit muoldda oaivvi ala
ja čatnet morašbiktasa alimiid birra.
Jerusalema nieiddat
sodjalahttet oaivvi eatnamii.
11Mu čalmmit sotnet čierrumis,
mu siskkildas báttada.
Mu fápmu lea golgan eatnamii,
danne go mu álbmot lea duššamin.
Unnoraččat ja njammimánát
roahppánit gávpoga gáhtaide.
12Sii ánuhallet etniineaset
láibbi ja viinni.
Hávváduvvan olbmuid láhkái
sii gahččet gávpoga gáhtaide,
rohttejit maŋimuš vuoiŋŋanasa
eatniset fátmmis.
13Maid mun dajašin dutnje,
nieida Jerusalem,
manin mun veardidivččen du?
Mainna veardádusain
jeđđešin du, Sion?
Stuoris dego áhpi lea du váddu,
gii máhtášii du dálkkastit?
14Du profehtaid oainnáhusat
ledje giellásat ja behtolaččat.
Eai sii almmustahttán dutnje
du suddovealggi,
eai sii jorgalan du vuorbbi.
Sin profetiat ledje behtolaš
ja čádjidahtti sánit.
15Buohkat geat mannet meattá,
doškejit bilkidemiin gieđaid oktii.
Sii njurgot dutnje, Jerusalem,
ja bárdet oaivvi:
“Dátgo lea dat gávpot mii gohčoduvvui
čábbodagastis ollisin,
oppa máilmmi ávvun?”
16Buot du vašálaččat
njezzot dutnje.
Sii njurgot, gižahit bániid ja dadjet:
“Mii leat vuoitán!
Dát de lea dat beaivi
maid mii vurddiimet,
dál beasaimet oaidnit dan
iežamet čalmmiiguin.”
17Hearrá lea dahkan dan maid áiggui,
son lea ollašuhttán sánis
maid lei almmuhan áigá juo.
Seasttekeahttá son gaikkodii du,
divttii du vašálačča illudit
ja attii du vuostálastiide fámu.
18Čuorvvo jitnosit Hearrá,
váidal heađát, nieida Sion!
Divtte gatnjaliid golgat johkan
ija beaivvi,
ale udno alccesat vuoiŋŋadusa
alege atte čalmmiidasat mášu.
19Lihka ihkku, čuorvvo jitnosit
idjagohcinvuoruid álggus,
golggat váimmot dego čázi
Hearrá muođuid ovdii.
Bajit gieđaid su beallái
ja rohkadala mánáidat heakka ovddas.
Sii vuoimmehuvvet nealgái
juohke gáhtačihkii.
20Geahča, Hearrá,
fuomáš geainna don leat meannudan ná!
Nissonat borret goaŧuset šaddosiid,
iežaset mánáid
geaid leat riegádahttán!
Báhpat ja profehtat goddojuvvojit
Hearrá bassibáikái!
21Nuorat ja boarrásat veallájit eatnamis,
olgun gáhtaguorain.
Mu nieiddat ja nuorra olbmát
leat gahččan miehkkái.
Don goddet sin moarát beaivvi,
don sorbmejit almmá seasttekeahttá.
22Don rávket balddáhusaid
juohke guovllus dego ávvudeapmái.
Hearrá moari beaivvi
ii oktage beassan báhtarussii,
ii oktage birgehan heakkas.
Vašálaš gottii mánáid
geaid mun ledjen riegádahttán
ja šaddadan.
